விக்கிரமங்கலம் அருகே பேச்சியம்மன் ஆலய கும்பாபிஷேகம்

மதுரை மாவட்டம், சோழவந்தான் அருகே விக்கிரமங்கலம் ஊராட்சிக்கு உட்பட்ட, நரியம்பட்டி கிராமத்தில் பேச்சியம்மன் கோவில் உள்ளது. இக்கோவில் திருப்பணிகள் மேற்கொள்ளப்பட்டு, மகா கும்பாபிஷேகம் நடைபெற்றது.

இவ்விழாவை முன்னிட்டு, இரண்டு நாள் யாக பூஜைகள் நடைபெற்று வந்தன. இதைத் தொடர்ந்து,  பெரியசம்பாதி பிள்ளை பழி கொடுத்த நல்லபிள்ளை தேவரின் ஏழு வீட்டு வகையறாக்கள் முன்னிலையில், சோழவந்தான் பிரசாத் சர்மா தலைமையில், புனிதநீர் குடங்கள்  எடுத்து வரப்பட்டு, மேளதாளத்துடன் கோவிலை வலம் வந்தனர்.

பின்னர், கோவில் கோபுர விமானத்தில், புனித கலசங்களுக்கு மகா கும்பாபிஷேகம் நடைபெற்றது . பேச்சி அம்மனுக்கு சிறப்பு அபிஷேகமும், அதையடுத்து மகா அபிஷேக, அலங்கார பூஜைகள் நடைபெற்றன. எட்டூர கிராம கமிட்டி தலைவர் ஜெயபால், ஊராட்சி மன்றத் தலைவர் கலியுகநாதன், முன்னாள் ஒன்றியக் கவுன்சிலர் விக்டோரியா பூர்வலிங்கம் உள்பட ஏராளமானோர் கலந்து கொண்டனர்.

கும்பாபிஷேகத்தை முன்னிட்டு, பக்தர்களுக்கு அன்னதானம் வழங்கப்பட்டது. விக்கிரமங்கலம் ஊராட்சி சுகாதாரப் பணிகள், போலீசார் பாதுகாப்பு ஏற்பாடுகளையும், ஏழு வீட்டு வகையறாக்கள் விழா ஏற்பாடுகளை செய்திருந்தனர்.