பெட்ரோல், டீசல் விலை ஜிஎஸ்டி வரம்புக்குள் கொண்டு வரப்படலாம் என அமைச்சர் விகே சிங் மதுரையில் கூறினார்.
மதுரையில் ஸ்ரீ ராமஜென்ம பூமி தீர்த்த சேத்திர அறக்கட்டளை சார்பாக ராம ரத யாத்திரை தொடங்கி வைக்க வருகை தந்த மத்திய கப்பல் மற்றும் சாலை போக்குவரத்து துறை இணை அமைச்சர் விகே.சிங் செய்தியாளர்களிடம் பேசும் போது, ராமர் ஆலயம் கட்டப்படுவதற்கு நாடு முழுவதும் உள்ள மக்கள் வரவேற்பு தெரிவித்து வருகின்றனர். ராமர் ஆலயம் கட்டப்படுவதோடு ராம ராஜ்ஜியம் உருவாக்கப்படும். தமிழகத்தில் பாஜக நல்ல வளர்ச்சியடைந்துள்ளது. பாஜகவுக்கு மக்கள் ஆதரவு தெரிவித்து வருகின்றனர்.பெட்ரோல், டீசல் விலை உயர்வு என்பது சுழற்சிமுறையில் ஆனது.
சர்வதேச நிலவரத்திற்கு ஏற்ப விலை நிலவரங்கள் மாறிக்கொண்டே இருக்கும்.கடந்த 2011 - 2014 ஆண்டுகளில் கேஸ் விலை ரூ. 1240 ஆக இருந்தது. தற்போது ரூ.750 என்ற அளவில் தான் உள்ளது. பெட்ரோல் விலை உயர்வு மக்களை பாதிக்காமல் இருக்க மத்திய அரசு நடவடிக்கை எடுத்து வருகிறது. இதன் ஒரு பகுதியாக பெட்ரோல், டீசல் விற்பனையில் ஜிஎஸ்டி வரம்புக்குள் கொண்டு வரப்படலாம் என்ற ஆலோசனையும் உள்ளது. மேலும் இது தொடர்பாக மாநிலங்களும் நடவடிக்கை எடுக்க வேண்டும் என்று விகே சிங் கூறினார்.