பூந்தண்டலம் ஊராட்சி ஒன்றியக்குழு உறுப்பினர் பதவிக்கு மறுவாக்குப்பதிவு துவக்கம்

காஞ்சிபுரம் மாவட்டம், குன்றத்தூர் ஊராட்சி ஒன்றியத்துக்குட்பட்ட பூந்தண்டலம் ஊராட்சி ஒன்றியக் குழு உறுப்பினருக்கான தேர்தல் கடந்த 9ஆம் தேதி நடைபெற்றது.

இதற்கான வாக்குப்பதிவு நடைபெற்றுக் கொண்டிருந்தபோது புதுச்சேரி ஊராட்சி ஒன்றிய தொடக்கப்பள்ளி வாக்குச்சாவடி எண்-173 வேட்பாளரின் சின்னம் வாக்குச்சீட்டில் இல்லை எனக் கூறி எதிர்ப்பு தெரிவிக்கப்பட்டதால் ஒன்றியக் குழு உறுப்பினர்க்கான வாக்குப்பதிவு நிறுத்தப்பட்டது.

அதன்பின் காஞ்சிபுரம் மாவட்ட தேர்தல் பார்வையாளர் அமுதவல்லி இதுகுறித்து விசாரணை மேற்கொண்டு இன்று காலை மீண்டும் மறுவாக்குப்பதிவு அந்த தொடக்கப் பள்ளி வாக்குச் சாவடியில் நடைபெறும் என அறிவித்தார்.

அதன்படி இன்று காலை 7.25 மணி அளவில் ஒன்றியக்குழு உறுப்பினர் வார்டு எண் 12 க்கான வாக்குப்பதிவு துவங்கியது. இந்த வாக்குச்சாவடியில் 280ஆண்கள் மற்றும் 326 பெண்கள் என 606 வாக்குகள் உள்ளது.

மறுவாக்குப்பதிவு நடைபெறுவதை ஒட்டி காவல்துறை பாதுகாப்பு ஏற்பாடுகளைச் செய்துள்ளது. வாக்காளர்களுக்கு வாக்குப்பதிவின் போது சனிடைசர் கையுறை மற்றும் வலதுகை நடுவிரலில் வாக்காளர் அடையாள மை இடப்படுகிறது.