வெப்பநிலை அதிகரிப்பு: மருத்துவமனைகளுக்கு மத்திய அரசு அறிவுறுத்தல்

கோடை மாதங்களில் வெப்பநிலை அதிகரிக்கும் போது , மருத்துவமனைகளில் தீ விபத்து ஒரு குறிப்பிடத்தக்க அச்சுறுத்தலாக மாறும். இதைத் தடுக்க, மத்திய சுகாதார அமைச்சகம் மற்றும் தேசியப் பேரிடர் மேலாண்மை ஆணையம் (என்.டி.எம்.ஏ) அனைத்து மாநிலங்கள்/யூனியன் பிரதேசங்களுக்கும் ஒரு கூட்டு ஆலோசனையை வழங்கியுள்ளது, இது போன்ற அசம்பாவித சம்பவங்களைத் தடுப்பதில் முன்முயற்சி நடவடிக்கைகளின் முக்கியத்துவத்தை இது அடிக்கோடிட்டுக் காட்டுகிறது.

மாநில சுகாதாரத் துறைகள் மற்றும் மாநில பேரிடர் மேலாண்மை அதிகாரிகள் தங்கள் பகுதியில் உள்ள அனைத்து அங்கீகாரம் பெற்ற மருத்துவமனைகளும் கீழ்க்கண்ட விசயங்கள் தொடர்பாக உடனடி நடவடிக்கை எடுப்பதை உறுதி செய்ய நெருக்கமாக ஒத்துழைக்க அறிவுறுத்தப்பட்டுள்ளனர்

தீ பாதுகாப்பு இணக்கத்தை மதிப்பிடுவதற்கு அனைத்து மருத்துவமனைகளிலும் விரிவான தீ பாதுகாப்பு தணிக்கை / கள ஆய்வுகளை நடத்த வேண்டும். தீயணைக்கும் அமைப்புகள், தீ எச்சரிக்கை அலாரம், தீ புகை கண்டுபிடிப்பான்கள், தீயணைப்பு கருவிகள் மற்றும் தீயணைப்பு லிஃப்ட்கள் ஆகியவற்றின் இருப்பு மற்றும் முழுமையான செயல்பாட்டை உறுதி செய்ய வேண்டும்

மருத்துவமனைகள் ஒழுங்குமுறைத் தேவைகளைக் கண்டிப்பாகக் கடைப்பிடிக்க வேண்டும் மற்றும் தீ தடையில்லா சான்றிதழ்களைப் பெற வேண்டும்.

தீ பாதுகாப்பு இணக்கத்தை உறுதி செய்வதற்காக மருத்துவமனைகள் மேற்கொள்ள வேண்டிய நடவடிக்கைகளை கோடிட்டுக் காட்டும் விரிவான வழிமுறைகள் அனைத்து மாநிலங்கள் மற்றும் யூனியன் பிரதேசங்களின் தலைமைச் செயலர்களுக்கும் வழங்கப்பட்டுள்ளன, மேலும் அனைத்து அங்கீகாரம் பெற்ற மருத்துவமனைகளிலும் தகவலைப் பரப்புவதற்கு பரிந்துரைக்கின்றன.

1 . மருத்துவமனைகள் மற்றும் பிற சுகாதார சேவைகளில் தீ விபத்துகள் ஏற்படுவதைத் தடுக்க பின்வரும் வழிமுறைகள் மேற்கொள்ளப்பட வேண்டும்

தீயணைப்பு கருவிகள், ஹைட்ரான்ட்கள் மற்றும் அலாரங்கள் போன்ற தீயணைப்பு உபகரணங்களை மருத்துவமனைகள் தொடர்ந்து ஆய்வு செய்ய வேண்டும் .

அனைத்து பாதுகாப்பு உபகரணங்களுக்கும் பராமரிப்பு அட்டவணையை அமைக்கவும். தீயை அணைக்கும் கருவிகளின் மாதாந்திர சோதனைகள், தீ அலாரங்கள் மற்றும் ஹைட்ரான்ட்டுகளின் காலாண்டு சோதனைகள் மற்றும் தொடர்புடைய இந்திய தரநிலைகளின்படி அவற்றின் செயல்திறனைச் சான்றளிப்பதற்கான வருடாந்திர தொழில்முறை ஆய்வுகள் ஆகியவை இதில் அடங்கும்.

மருத்துவமனையின் மின் நுகர்வை மதிப்பிடுவதற்கு ஆண்டுக்கு இருமுறை மின் தணிக்கைகள் நடத்தப்பட வேண்டும்.

ஆக்ஸிஜன் தொட்டிகள் அல்லது குழாய் ஆக்ஸிஜன் உள்ள பகுதிகளில், கடுமையான புகைபிடிக்காத கொள்கைகள் மற்றும் வெப்ப மூலங்களில் கட்டுப்பாடுகளை செயல்படுத்த வேண்டும்.

அனைத்து மருத்துவமனை பகுதிகளிலும் தீ புகை கண்டுபிடிப்பான்கள் மற்றும் தீ எச்சரிக்கை அலாரங்கள் நிறுவப்பட்டிருப்பதை உறுதி செய்ய வேண்டும். குறிப்பாக நோயாளி அறைகள், கூடங்கள் மற்றும் பொதுவான பகுதிகளில் இந்த நடவடிக்கைகள் தீவிரப்படுத்தப்பட வேண்டும்.

இந்த முக்கியமான பாதுகாப்பு நடவடிக்கைகள் அமல்படுத்தப்படுவதை உறுதி செய்வதற்காக தொடர் ஆய்வுகளை நடத்துமாறு மாநிலங்கள் / யூனியன் பிரதேசங்கள் வலியுறுத்தப்பட்டுள்ளன.

மருத்துவமனைகளில் தீ விபத்து எச்சரிக்கை அமைப்பின் கட்டமைப்பு

மருத்துவமனைகளில் தீ விபத்து எச்சரிக்கைகள் என்பது உயிர் காக்கும் அமைப்புகளாகும். இந்த அமைப்புகளின் முக்கிய கூறுகள் பின்வருமாறு:

தீ கண்டறிதல் கருவிகள்: இவற்றில் புகை உணரிகள், வெப்ப உணரிகள் மற்றும் தீச்சுடர் கண்டறியும் கருவிகள் ஆகியவை அடங்கும். இவை ஆபத்தின் ஆரம்ப அறிகுறிகளைக் கண்டறியும் வகையில் வடிவமைக்கப்பட்டுள்ளன.

கட்டுப்பாட்டு பலகை (Control Panel): இது அமைப்பின் மையமாகும். கண்டறிதல் கருவிகளிலிருந்து வரும் சமிக்ஞைகளை இது செயலாக்குகிறது மற்றும் எச்சரிக்கை ஒலிகளை வெளியிடுவது, தீயணைப்புத் துறைக்கு தொடர்பு கொள்வது போன்ற செயல்களை தொடங்குகிறது.

எச்சரிக்கை சாதனங்கள்: இதில் ஒலிப்பான்கள், ஸ்ட்ரோப் விளக்குகள் மற்றும் கட்டடத்தின் காலியாக்கம் தொடர்பான அறிவிப்புகளை வழங்குபவை அடங்கும்.

காப்பு மின்சாரம்: தீ விபத்தின் போது மின்சாரம் தடைபட்டாலும் அலாரம் அமைப்பு தொடர்ந்து செயல்படுவதை இவை உறுதி செய்கின்றன.

மருத்துவமனைகளில் கூடுதல் பாதுகாப்பு அம்சங்கள்

புகைப் பிரிவுகள்: தீயும் புகையும் பரவுவதை கட்டுப்படுத்த கட்டிடத்தின் பல்வேறு பிரிவுகளுக்கு இடையே தீ-எதிர்ப்புத் தடைகள் அமைக்கப்படுகின்றன.

தானியங்கி தெளிப்பான்கள் (Sprinklers): தீயின் ஆரம்ப கட்டத்தைக் கட்டுப்படுத்த அல்லது அணைக்க உதவும் நீர் சார்ந்த அமைப்புகள்.

அவசர வெளியேறும் வழிகள்: நோயாளிகள் மற்றும் ஊழியர்கள் இடம் விட்டு பாதுகாப்பாக வெளியேறுவதற்கான தெளிவாகக் குறிக்கப்பட்ட வழிகள்.

மருத்துவமனைகளில் உள்ள தீ எச்சரிக்கை அமைப்புகள் நோயாளிகள், ஊழியர்கள் மற்றும் பார்வையாளர்களின் பாதுகாப்பிற்கு இன்றியமையாதவை.