ஒடிசா ரயில் விபத்தில் உயிரிழப்பு 230 ஆக உயர்வு: 900 பேர் படுகாயம்.. துக்க நாள் அனுசரிப்பு

சென்னை சென்ட்ரல் ரயில் நிலையத்திலிருந்து ஹவுராவிற்கு எக்ஸ்பிரஸ் ரயில்கள் இயக்கப்பட்டு வருகிறது. இந்நிலையில் ஹவுரா- சென்னை கோரமண்டல் எக்ஸ்பிரஸ் ரயில் ஹவுராவில் இருந்து புறப்பட்டு சென்னை நோக்கி வந்து கொண்டிருந்தது.

அந்த ரயில் இன்று இரவு 7 மணி அளவில் ஒடிசா மாநிலம் பாலசோர் என்ற இடம் அருகே வந்தபோது அந்த ரயிலின் மீது ஒரு சரக்கு ரயில் மோதியது. இதில் கோரமண்டல் எக்ஸ்பிரஸ் ரயிலின் நான்கு பெட்டிகள் தடம் புரண்டன. திடீரென ஏற்பட்ட இந்த விபத்தினால் பயணிகள் அய்யோ அம்மா என அலறினார்கள். இந்த விபத்தில் இதுவரை 230 பேர் உயிரிழந்துள்ளனர். படுகாயமடைந்தோரின் எண்ணிக்கை 900 ஆக உள்ளது.

இந்த விபத்தில் காயம் அடைந்தவர்கள் பற்றிய விவரங்களை அறிந்து கொள்வதற்காக சென்னை சென்ட்ரல் ரயில் நிலையத்தில் பொதுமக்கள் தொடர்பு கொள்வதற்காக தனியாக கட்டுப்பாட்டு அறை அமைக்கப்பட்டு தொலைபேசி எண்கள் வெளியிடப்பட்டுள்ளன.

ஒடிசா முதல்வர் நவீன் பட்நாயக், புவனேஸ்வரில் உள்ள கட்டுப்பாட்டு அறையில் மீட்புப் பணிகளை ஆய்வு செய்தார் மற்றும் காயமடைந்த அனைவருக்கும் இலவச மருத்துவ சிகிச்சை அளிக்க உத்தரவிட்டுள்ளார்.

ரயில் தடம் புரண்ட சம்பவத்தை அடுத்து, மாநிலக் கொண்டாட்டங்கள் எதுவும் நடைபெறாது என்று ஒடிசா முதல்வர் நவீன் பட்நாயக் துக்க நாள் அறிவித்துள்ளார்.

புவனேஸ்வரில் உள்ள கட்டுப்பாட்டு அறை, எஸ்ஆர்சியில் மீட்புப் பணிகளை முதல்வர் ஆய்வு செய்து, காயமடைந்த அனைவருக்கும் இலவச மருத்துவ சிகிச்சை அளிக்க உத்தரவிட்டுள்ளார்.

மாவட்ட ஆட்சியர்கள், எஸ்பி மற்றும் பாலசோர், பத்ரக், ஜாஜ்பூர் மற்றும் கெண்டுஜார் மாவட்ட நிர்வாகங்களின் அதிகாரிகளும் நடவடிக்கையை மேற்பார்வையிடுமாறு கேட்டுக் கொள்ளப்பட்டுள்ளனர்.

விபத்துக்கான காரணத்தை கண்டறிய உயர்மட்ட விசாரணைக்கு ரயில்வே அமைச்சர் அஸ்வினி வைஷ்ணவ் உத்தரவிட்டுள்ளார்.

இதுகுறித்து அதிகாரி ஒருவர் கூறுகையில், பெங்களூரு-ஹவுரா சூப்பர்ஃபாஸ்ட் எக்ஸ்பிரஸின் பல பெட்டிகள் தடம் புரண்டு அருகிலுள்ள தண்டவாளத்தில் விழுந்தன. இந்த பெட்டிகள் ஷாலிமார்-சென்னை சென்ட்ரல் கோரமண்டல் எக்ஸ்பிரஸ் மீது மோதியதில் அதன் பெட்டிகளும் கவிழ்ந்தன. சென்னை நோக்கிச் சென்ற கோரமண்டல் எக்ஸ்பிரஸின் சில பெட்டிகளும் சரக்கு ரயிலின் வேகன் மீது மோதியதாக தெரிவித்தார்.

ஒடிசா தலைமைச் செயலாளர் பிரதீப் ஜெனா தனது ட்விட்டர் பதிவில், "பாலாசோரில் ஒரே இரவில் 500 யூனிட் ரத்தம் சேகரிக்கப்பட்டுள்ளது. தற்போது 900 யூனிட்கள் கையிருப்பில் உள்ளது. இது விபத்தில் பாதிக்கப்பட்டவர்களுக்கு சிகிச்சை அளிக்க உதவும்’’ என பதிவிட்டுள்ளார்.

ஒடிசாவின் இயக்குநர் ஜெனரல், தீயணைப்பு சேவைகள், சுதன்ஷு சாரங்கி, "நாங்கள் சம்பவ இடத்தில் 14 குழுக்களை நிறுத்தியுள்ளோம். ஏற்கனவே காயமடைந்த 400க்கும் மேற்பட்டோர் பல்வேறு மருத்துவமனைகளில் அனுமதிக்கப்பட்டுள்ளனர்" என்றார்.

ஒடிசா பேரிடர் விரைவு நடவடிக்கைப் படையின் (ODRAF) நான்கு பிரிவுகள், தேசிய பேரிடர் மீட்பு நிதியத்தின் (NDRF) மூன்று பிரிவுகள், 200க்கும் மேற்பட்ட ஆம்புலன்ஸ்கள் மற்றும் 22 தீயணைப்புப் பணியாளர்கள் மீட்புப் பணிகளுக்காக ஈடுபடுத்தப்பட்டுள்ளனர்.

இச்சம்பவம் காரணமாக நேற்று முதல் 20க்கும் மேற்பட்ட ரயில் சேவைகள் ரத்து செய்யப்பட்டதாக தென்கிழக்கு ரயில்வே வெளியிட்டுள்ள செய்திக் குறிப்பில் தெரிவிக்கப்பட்டுள்ளது.

ஒடிசா அரசு 06782-262286 என்ற ஹெல்ப்லைன் எண்ணை வெளியிட்டுள்ளது. 

பத்ரக்: 8455889900

ஜாஜ்பூர் கியோனிஹார் சாலை: 8455889906

கட்டாக்: 8455889917

புவனேஸ்வர்: 8455889922

குர்தா சாலை: 6370108046

பிரம்மாபூர்: 89173887241

பாலுகான்: 9937732169

பலாசா: 8978881006

ஹவுரா ஹெல்ப்லைன் எண்: 033-26382217