முறிந்தது முப்பதாண்டு கால நட்பு: மணிரத்னம் - வைரமுத்து

இயக்குநர் மணிரத்னத்தின் 'ரோஜா' திரைப்படத்திலிருந்து அவர் இயக்கிய அனைத்துப் படங்களிலும் வைரமுத்து பாடல் எழுதி வந்தார். ஆனால், இன்னும் பத்து நாட்களில் உலகமெங்கும் திரையரங்குகளில் வெளியாகவிருக்கும் மணிரத்னத்தின் கனவுப் படமான 'பொன்னியின் செல்வன்' படத்தில் வைரமுத்துவின் பாடல் இல்லை.

சற்றேறக்குறைய முப்பதாண்டுகளாக இருவருக்குள்ளும் இருந்த நட்பு இதனால், முறிந்தது என்பதுதான் இருவரின் நெருங்கிய வட்டத்தினர் கூறும் கருத்தாகும். 'பொன்னியின் செல்வன்' படத்தில் கபிலன், இளங்கோ கிருஷ்ணன், வெண்பா ஆகியோர் பாடல்கள் எழுதியுள்ளனர் என்பது குறிப்பித்தக்கது.

இந்தநிலையில், சென்னையில் நேற்று(19/09/2022) நடந்த 'பொன்னியின் செல்வன்' படத்தின் செய்தியாளர் சந்திப்பின்போது பேசிய இயக்குநர் மணிரத்னம், வைரமுத்து குறித்து எழுப்பப்பட்ட கேள்விக்கு,

''வைரமுத்துவைவிட திறமையான பாடலாசிரியர்கள் தமிழ் சினிமாவில் நிறைய பேர் இருக்கிறார்கள். தமிழ் மொழி பன்னெடுங்காலமாக உள்ளது. தமிழ் சினிமாவில் நிறைய இயக்குநர்கள் இருக்கிறார்கள். திறமையான புதுமுக இயக்குநர்கள் தமிழ் சினிமாவுக்கு வருகிறார்கள்.

அதைப்போலவே, தமிழ் மொழியில் நிறைய வளம் இருக்கிறது. நான் வைரமுத்து சாருடன் நிறைய படங்களில் சேர்ந்து பணியாற்றியுள்ளேன். நானும் ரகுமானும் இணைந்து அவருடைய நிறைய கவிதைகளை பாடல்களாக்கியுள்ளோம். அவர் ஓர் அற்புதமான கவிஞர். ஆனால், அவரைவிட புதிய திறமையான பாடலாசிரியர்கள் நிறைய பேர் வருகிறார்கள்'' என்று குறிப்பிட்டார்.