ஆக 28 ல்.. தனி ஒருவன் 2.. ரசிகர்கள் எதிர்பார்ப்பு!

தனி ஒருவன் 2 திரைப்படத்தின் அதிகாரப்பூர்வ அறிவிப்பு வரும் ஆகஸ்ட் 28 அன்று வெளியாகலாம் என்று கூறப்படுகிறது. இதனால் அந்த படத்துக்கான ரசிகர்கள் குஷியாகியுள்ளனர்.

மோகன்ராஜா இயக்கத்தில் கடந்த 2015-ம் ஆண்டு வெளியான தனி ஒருவன் திரைப்படத்தில், ஜெயம் ரவி, அரவிந்த் சாமி, நயன்தாரா, ஹரிஷ் உத்தமன், கணேஷ் வெங்கட்ராமன் உள்ளிட்டோர் நடித்திருந்தனர். இந்த படம் மிகவும் நல்ல வரவேற்பை பெற்றதோடு வசூலிலும் பல சாதனைகளை புரிந்தது.

அரவிந்த் சாமி சித்தார்த் அபிமன்யு என்ற கதாபாத்திரத்தில் கெத்தாக நடித்திருந்தார். அவரை துரத்திப் பிடிக்கும் மித்ரன் ஐபிஎஸ் கதாபாத்திரத்தில் ஜெயம் ரவியும் வாழ்ந்திருந்தார் என்றுதான் சொல்ல வேண்டும். இருவருக்கும் அவர்களது கதாபாத்திரங்கள் சரிசமமானதாக காலம் கடந்தும் பேசப்படும் நிலையிலும் அமையப் பெற்றது. இதுவரை ஜெயம்ரவி நடித்த படங்களை வரிசைப்படுத்தி பார்த்தால் அதில் தனி ஒருவனுக்கென முதல் இடம் கொடுக்கலாம். அந்த அளவுக்கு மிகச் சிறப்பான படம் அது.

ரசிகர்களின் ஆதரவைப் பெற்று விமர்சன ரீதியாகவும், வசூல் ரீதியாகவும் மாபெரும் வெற்றி பெற்ற தனி ஒருவன் படம் வெளியான நாளிலிருந்தே இந்த படத்துக்கான சீக்குவல் அதாவது இரண்டாவது பாகம் எப்போது வரும் என்று பலரும் கேட்கத் துவங்கிவிட்டனர். இதற்கு காரணம் ரசிகர்களிடையே இருந்து வரும் எதிர்பார்ப்பு தான். இன்று வரை மோகன்ராஜாவிடம் கேட்கும் கேள்வி தனிஒருவன் 2 பற்றியதுதான். 

இந்நிலையில், வரும் ஆகஸ்ட் 28-ம் தேதியுடன் தனி ஒருவன் படம் வெளியாகி 8 ஆண்டுகள் நிறைவடைய இருக்கின்றன. இதுதான் சரியான வாய்ப்பு எனவும் அன்றைய தினமே படத்தின் இரண்டாம் பாகத்துக்கான அதிகாரப்பூர்வ அறிவிப்பை வெளியிட்டால் நன்றாக இருக்குமே என ரசிகர்கள் பேசிக் கொண்டிருக்கையில், அவர்களின் ஆசைப்படி அதே நாளில் இதுகுறித்த அறிவிப்பு வெளியாகும் என தகவல்கள் தெரிவிக்கின்றன.

மோகன்ராஜாவை பொறுத்தவரை அவர் பெரும்பாலும் ரீமேக் படங்களையே எடுத்து வந்தார். அவரது சொந்த கதைகளில் ஒன்று இந்த தனி ஒருவன் படம். கடைசியாக மோகன்லால் நடித்த ‘லூசிஃபர்’ படத்தை சிரஞ்சிவி நடிக்க தெலுங்கில் ரீமேக் செய்திருந்தார். இதையடுத்து அவர் தனி ஒருவன் படத்தின் இரண்டாம் பாகத்தை இயக்க உள்ளதாகவும் அதற்கான அறிவிப்பு வரும் ஆகஸ்ட் 28ம் தேதி வெளியாகும் எனவும் கூறப்படுகிறது. இதில் ஜெயம் ரவியுடன் இணைந்து மம்மூட்டியும் நடிக்கலாம் என்று எதிர்பார்க்கப்படுகிறது.

இருப்பினும், படத்தின் ஸ்கிரிப்ட், நடிகர்களின் பட்டியல், வெளியீட்டு தேதி போன்ற தகவல்கள் எதுவும் இதுவரை வெளியாகவில்லை. படம் தமிழ், தெலுங்கு மற்றும் மலையாளம் ஆகிய மூன்று மொழிகளிலும் வெளியாகும் என எதிர்பார்க்கப்படுகிறது.

தனி ஒருவன் 2 திரைப்படம் வெளியாகும் என்ற அறிவிப்பு ரசிகர்களிடையே பெரும் மகிழ்ச்சியை ஏற்படுத்தியுள்ளது. படத்தின் இரண்டாம் பாகம் எப்படி இருக்கும் என்பதை பார்க்க ரசிகர்கள் ஆர்வமாக காத்திருக்கின்றனர்.