Thalapathy 69: விஜய்யுடன் கைகோர்ப்பாரா கௌதம் ?

தமிழ் சினிமாவின் உச்ச நட்சத்திரமான தளபதி விஜய்யின் ரசிகர்கள் இப்போது ஒரே ஒரு கேள்வியைத்தான் திரும்பத் திரும்பக் கேட்டுக் கொண்டிருக்கிறார்கள் – அவரது 69வது படத்தின் இயக்குநர் யார்? சமீபத்தில், "விண்ணைத்தாண்டி வருவாயா", "வேட்டையாடு விளையாடு" போன்ற வெற்றிப் படங்களை இயக்கிய கௌதம் வாசுதேவ் மேனன், இப்படத்தை இயக்குவார் என்ற வதந்திகள் ரசிகர்களிடையே புதிய உற்சாகத்தை ஏற்படுத்தியுள்ளன. ஏற்கனவே கௌதம், விஜய்க்கு கதை ஒன்றை சொல்லி அது ஏற்கப்பட்டு சில காரணங்களால் படம் எடுக்கப்படமுடியாமல் கைவிடப்பட்டது நினைவிருக்கலாம்.

சமூக வலைதளங்களில் சூடு

இந்த பரபரப்பான ஊகங்கள் எங்கிருந்து தொடங்கின? ஒரு ரசிகரின் கேள்வியிலிருந்துதான். "விஜய் சாரின் கடைசிப் படத்தை நீங்கள் இயக்குவீர்களா?" என்ற நேரடியான கேள்விக்கு கௌதம் மேனன், "அந்த வாய்ப்பு கிடைத்தால் கட்டாயம் இயக்குவேன்" என பதிலளித்தார்.

பிரபல இயக்குநரின் இந்த பதிலால், சமூக வலைதளங்கள் கொழுந்துவிட்டு எரிகின்றன. தளபதி ரசிகர்கள் மட்டுமல்ல, பொதுவான சினிமா ஆர்வலர்களும் தளபதி 69-ல் இந்த கூட்டணி சாத்தியமா என்ற ஆர்வத்தில் இருக்கிறார்கள்.ஒருவேளை விஜய் தனது அடுத்த படமாக கௌதம் மேனன் கதையை தேர்ந்தெடுத்தால் நிச்சயம் அது மிகப் பெரிய பட்ஜெட் படமாகத்தான் இருக்கும். 

மாறுபட்ட பாணியின் மோதல்?

காதல் கதைகளை நயமான காட்சிகளோடு, நேர்த்தியாக சொல்வதில் வல்லவரான கௌதம் மேனன், மாஸ் ஹீரோவான தளபதி விஜய்யுடன் இணைவதாக இருக்கும்பட்சத்தில் அது பலருடைய புருவங்களை உயர்த்தி இருக்கிறது. கௌதம் மேனன் படங்களின் ஹீரோக்கள் பொதுவாக சாக்லேட் பாய் இமேஜ் கொண்டவர்கள். தளபதி விஜய்யோ ஆக்‌ஷனும் மாசும் நிறைந்த கமர்ஷியல் படங்களுக்கு முகவரி. இந்த இரண்டு வெவ்வேறு பாணிகளின் மோதல் எப்படிப்பட்ட திரை அனுபவத்தைத் தரும் என்ற எதிர்பார்ப்பு ரசிகர்களிடையே பலமாக இருக்கிறது. 

கௌதம் மேனன் படத்தில் காதல் காட்சிகள் அதிகம் கொண்ட படங்களும் உண்டு, அதிரடி நிறைந்த படங்களும் உண்டு என்பதால், இந்த படம் எந்த கலவையில் வரும் என்பதை எதிர்பார்த்து காத்திருக்கின்றனர் ரசிகர்கள். 

ரசிகர்களின் கனவுப் பட்டியல்

கௌதம் மேனன் மட்டுமல்ல, தமிழ் சினிமாவின் முன்னணி இயக்குநர்கள் பலரும் தளபதி 69 படத்தை இயக்கும் வாய்ப்புக்காக வரிசையில் காத்திருப்பதாகத் தெரிகிறது. ரசிகர்கள் மத்தியிலோ தங்கள் கனவு இயக்குநர்களின் பட்டியல் நீண்டு கொண்டே போகிறது. ஷங்கர், ஏ.ஆர்.முருகதாஸ், அட்லீ, லோகேஷ் கனகராஜ் என எல்லா முக்கியப் பெயர்களும் விவாத மேடையில் உள்ளன. லோகேஷ் கனகராஜ், அட்லீ இருவரும் அடுத்தடுத்த புராஜக்ட்களில் பிஸியாகிவிட்ட நிலையில், அவர்கள் இயக்குவதில்லை என்பது தெரிகிறது. அதேநேரத்தில் வெற்றிமாறனுடன் இணைய அதிக வாய்ப்பிருப்பதாக கூறப்பட்டது. ஆனால் வாடிவாசலை கையிலெடுத்துவிட்டால் அது சாத்தியமில்லை.

கதாநாயகி முதல் கதை வரை

தற்போது தளபதி விஜய், வெங்கட் பிரபு இயக்கத்தில் "தி கிரேட்டஸ்ட் ஆஃப் ஆல் டைம்" படத்தின் படப்பிடிப்பில் மும்முரமாக நடித்து வருகிறார். அதன் பிறகுதான் தளபதி 69க்கான அறிவிப்புகள் வரும் என எதிர்பார்க்கப்படுகிறது. படத்தின் இயக்குநர் மட்டுமல்ல, கதாநாயகி யார், இசையமைப்பாளர் யார் என எல்லாமே திரை ரசிகர்களின் ஆர்வத்தைத் தூண்டுகின்றன. ஏப்ரல் மாத மத்தியில் இந்த படம் குறித்த அறிவிப்பு வெளியாக வாய்ப்பிருப்பதாக கூறப்படுகிறது. 

தயாரிப்பு நிறுவனம் சொல்வது என்ன?

கடந்த சில தளபதி விஜய் படங்களைப் போலவே தளபதி 69 படத்தையும் சன் பிக்சர்ஸ் நிறுவனம் தயாரிக்கலாம் அல்லது சமூக வலைத்தளங்களில் வைரலாகி வருவதைப் போன்று டிவிவி நிறுவனம் தயாரிக்கலாம் என்ற பேச்சுகளும் அடிபடுகின்றன. ஆனால் இன்னும் அதிகாரபூர்வ அறிவிப்புகள் எதுவும் வரவில்லை. இந்தக் காத்திருப்பே ரசிகர்களின் ஆர்வத்தை அதிகரிக்கிறது.

எப்போது அந்த அதிகாரபூர்வ அறிவிப்பு?

தளபதி 69 பற்றிய அறிவிப்பு எப்போது வெளியாகும் என்பதை தமிழ் சினிமா ஆவலுடன் எதிர்பார்த்துள்ளது. சில மாதங்களில் தெளிவு பிறக்கும் என தகவல்கள் சொல்கின்றன. அதுவரை, ரசிகர்களின் யூகங்களும், காத்திருப்பும் தொடரும்.