மளிகை வியாபாரியிடம் புகையிலை பொருட்கள் பறிமுதல்

மளிகை வியாபாரியிடம் புகையிலை பொருட்கள் பறிமுதல்

நாமக்கல் மாவட்டம், நல்லிபாளையம் பகுதியில் நடந்த வாகன சோதனையின் போது ரூ.70,000 மதிப்புள்ள தடை செய்யப்பட்ட புகையிலை பொருட்கள் பறிமுதல் செய்யப்பட்டது. இந்த சோதனை, நாமக்கல்–திருச்செங்கோடு சாலையில் எஸ்.ஐ. செல்வராசு தலைமையில் எஸ்.எஸ்.ஐ. பாலசுப்ரமணி மற்றும் போலீசாரால் நடத்தப்பட்டது. நேற்று முன்தினம் மாலை 6:00 மணியளவில் நடைபெற்ற இந்த சோதனையின் போது, அந்த வழியாக வந்த ‘ஐ10’ காரை நிறுத்தி சோதனை செய்ததில், ஹான்ஸ் உள்ளிட்ட புகையிலை பொருட்கள் மளிகை வியாபாரி கடத்தி வந்தது கண்டுபிடிக்கப்பட்டது.

விசாரணையில், நாமக்கலைச் சேர்ந்த மவுனீஸ் (22) மற்றும் மளிகை வியாபாரி பிரவீன்குமார் (21) ஆகிய இருவரும் காரில் இருந்தது தெரியவந்தது. மேலும், அவர்கள் இந்த பொருட்களை கர்நாடக மாநிலம் பெங்களூருவில் இருந்து கடத்தி வந்ததும் உறுதி செய்யப்பட்டது. இதையடுத்து, நல்லிபாளையம் போலீசார் இருவரையும் கைது செய்து, ரூ.70,000 மதிப்புள்ள 132 கிலோ புகையிலை பொருட்கள் மற்றும் கடத்தலுக்கு பயன்படுத்தப்பட்ட காரையும் பறிமுதல் செய்தனர்.