மர்ம நபர்கள் திருடும் பேட்டரி - மக்கள் அச்சம்

மர்ம நபர்கள் திருடும் பேட்டரி - மக்கள் அச்சம்

எருமப்பட்டி யூனியனில் பேட்டரி திருட்டு சம்பவங்கள் தொடர்ந்து அதிகரித்து வருவதால், பொதுமக்கள் பெரும் அதிர்ச்சியிலும் அச்சத்திலும் உள்ளனர். சமீபத்தில், பொட்டிரெட்டிப்பட்டி கெஜகோம்பையை சேர்ந்த பழனிமுத்து (வயது 45) என்பவர், மே 4ம் தேதி எருமப்பட்டி அக்னி மாரியம்மன் கோவிலில் நடைபெற்ற காப்பு கட்டும் விழாவுக்காக தீர்த்தக்குடம் எடுத்துச் சென்றார். அவர் தனது சொந்த லாரியை கோவில் அருகே நிறுத்திவைத்து சென்ற நிலையில், திரும்பி வந்தபோது லாரியில் இருந்த பேட்டரி மர்ம நபர்களால் திருடப்பட்டிருந்தது.

இதேபோல், சில நாட்களுக்கு முன்னர், பொன்னேரி கைகாட்டி பகுதியில் குமார் என்பவரது வீட்டில் நிறுத்தி வைக்கப்பட்டிருந்த டிராக்டரின் பேட்டரி மர்ம நபர்களால் திருடப்பட்டது. இந்த வகை சம்பவங்கள் தொடர்ந்து நடைபெற்று வருவதால், எருமப்பட்டி பகுதிகள் பேட்டரி திருடர்களின் இலக்காக மாறி வருகின்றன. மக்கள் இரவு நேரங்களில் வாகனங்களை வெளியே நிறுத்த பயப்படும் நிலை உருவாகியுள்ளது.

போலீசார் இதுவரை பேட்டரி திருடர்களை அடையாளம் காணவில்லை என்பது மக்களில் நம்பிக்கையை குறைத்து விட்டதாகவும், துரித நடவடிக்கை எடுத்து, மர்ம நபர்களை கைது செய்ய வேண்டும் எனவும் பொதுமக்கள் வலியுறுத்தி வருகின்றனர். இத்தகைய திருட்டுகள் தொடருமானால், விவசாயிகள் மற்றும் வியாபாரிகளுக்கு பெரும் இழப்பு ஏற்படும் என்பதும் குறிப்பிடத்தக்கது.