சிறப்பாசிரியர்களுக்கான திறன் மேம்பாட்டு பயிற்சி முகாம்

சிறப்பாசிரியர்களுக்கான திறன் மேம்பாட்டு பயிற்சி முகாம்

நாமக்கல் மாவட்டத்தில் ஒருங்கிணைந்த பள்ளிக்கல்வித் துறையின் கீழ் பணியாற்றும் மாற்றுத்திறன் குழந்தைகளுக்கான சிறப்பு பயிற்றுனர்களுக்காக, இருநாள் திறன் மேம்பாட்டு பயிற்சி முகாம் மாவட்ட திட்ட அலுவலகத்தில் சிறப்பாக நடைபெற்றது. மாவட்ட முதன்மை கல்வி அலுவலர் மகேஸ்வரி தலைமையில் முகாம் தொடங்கப்பட்டது. நிகழ்வில், மாற்றுத்திறனாளி மாணவர்களை எளிய முறையில் அறிந்துகொள்வது, கையாள்வது மற்றும் அவர்களுக்கு ஏற்ற வகையில் கற்பித்தல் முறை குறித்து அவர் விளக்கினார்.

பயிற்சி முகாமில், உதவி திட்ட அலுவலர் குமார், மாற்றுத்திறனாளிகள் பற்றிய 21 வகைப்பாடுகளை தெளிவாக எடுத்துரைத்தார். மேலும், ஆட்டிசம் கொண்ட மாணவர்களை கையாளும் நடைமுறை, குறிப்பிட்ட கற்றல் குறைபாடுகள் உள்ள மாணவர்களுக்கு ஏற்ற கற்பித்தல் முறைகள், குழந்தைகளின் தனித்தன்மை புரிந்து அவர்களுக்கு விருப்பமான விதத்தில் பாடங்களை எடுத்துச்செல்லும் நுண்ணறிவு முறைகள் பற்றி பயிற்சி அளிக்கப்பட்டது.

இந்த பயிற்சியில் சிறப்பாசிரியர்கள் ஆனந்தகுமார் மற்றும் பெரியசாமி கருத்தாளர்களாக பங்கேற்று விரிவான விளக்கங்களை வழங்கினர். முகாமின் அனைத்து ஏற்பாடுகளையும் மாவட்ட ஒருங்கிணைப்பாளர் கோமதி சீராக செய்திருந்தார். இந்த பயிற்சி முகாம் மூலம் சிறப்பு ஆசிரியர்கள் தங்கள் சேவையை இன்னும் சிறப்பாக மேற்கொள்ளும் திறனை பெற்றனர் என்பது குறிப்பிடத்தக்கது.