தமிழ் புத்தாண்டு புதுநாளில் வெங்கரை அம்மன் சித்திரை கட்டளை திருவிழா

வெங்கரை அம்மன் சித்திரை கட்டளை விழா

பரமத்திவேலூர் அருகேயுள்ள வெங்கரையில் அமைந்துள்ள பிரசித்திபெற்ற வெங்கரை அம்மன் கோவில், பக்தர்களிடையே ஆன்மிகமாகவும் பாரம்பரியமாகவும் முக்கிய இடம் பெற்றுள்ளது. இக்கோவிலில், ஆண்டுதோறும் தமிழ் புத்தாண்டை ஒட்டி நடைபெறும் சித்திரை கட்டளை பூஜை, இந்த ஆண்டு 46வது முறையாக நேற்று சிறப்பாக நடைபெற்றது. காலை 7:00 மணிக்கு, பக்தர்கள் காவிரி ஆற்றுக்குச் சென்று புனித தீர்த்தம் எடுத்து, பால்குடங்களை ஊர்வலமாக கோவிலுக்குக் கொண்டுவந்தனர். அதன் பின்னர் காலை 11:00 மணிக்கு, பால், தயிர், இளநீர், பன்னீர், தேன், மஞ்சள், சந்தனம் உள்ளிட்ட 18 வகையான வாசனை திரவியங்களால் அம்மனுக்கு சிறப்பு அபிஷேகம் நடைபெற்றது. மதியம் 12:00 மணிக்கு அம்மனுக்கு சிறப்பு பூஜை மற்றும் தீபாராதனை நடைபெற்றது. இதில் ஏராளமான பக்தர்கள் பங்கேற்று இறைவியின் அருளைப் பெற்றனர். நிகழ்வின் ஒரு பகுதியாக, பக்தர்களுக்காக அன்னதானம் வழங்கப்பட்டதுடன், பிரசாதமும் வழங்கப்பட்டது. மாலை 6:00 மணிக்கு வெங்கரை அம்மன் திருவீதி உலா நடைபெற்று, பக்தர்கள் பக்தியுடன் பங்கேற்று விழாவை சிறப்பித்தனர். இந்த நிகழ்வுகள் அனைத்தும் பக்திப் பரவசம் மற்றும் ஆன்மிக பூரணத்துடன் நடைபெற்றன.