விளையாட்டு போட்டியில் வெற்றி பெற்றவர்களுக்கு எம்எல்ஏ பரிசு

விழுப்புரம் மாவட்ட பள்ளிக்கல்வித்துறை சார்பில் 2022-23ம் ஆண்டுக்கான விழுப்புரம் குறுமைய விளையாட்டு போட்டிகள் விழுப்புரத்தில் உள்ள மாவட்ட விளையாட்டு மைதானத்தில் நடைபெற்றது.

இதில் விழுப்புரம் கல்வி மாவட்டத்திற்குட்பட்ட பல்வேறு அரசு மற்றும் தனியார் பள்ளிகளை சேர்ந்த மாணவ- மாணவிகள் 300-க்கும் மேற்பட்டோர் ஆர்வமுடன் கலந்துகொண்டு பல்வேறு போட்டிகளில் விளையாடினர். இதில் வெற்றி பெற்ற மாணவ- மாணவிகளுக்கு பரிசளிப்பு விழா நடைபெற்றது.

விழாவில் விழுப்புரம் தொகுதி சட்டமன்ற உறுப்பினர் டாக்டர் இரா.லட்சுமணன் கலந்துகொண்டு வெற்றி பெற்ற அணிகளுக்கு கோப்பைகள் மற்றும் பரிசுகளை வழங்கி பாராட்டினார்.

இதில் மாவட்ட கல்வி அலுவலர் காளிதாஸ், உடற்கல்வி ஆசிரியர் எட்வின், பெற்றோர் ஆசிரியர் கழக செயலாளர் மணிவண்ணன், உடற்கல்வி ஆசிரியர்கள், பெற்றோர்கள் உட்பட பலர் கலந்து கொண்டனர்.