விழுப்புரம் மாவட்டத்தில் கடந்த ஆண்டை விட மது விற்பனை ரூ.2 கோடி அதிகம்

TASMAC News Today Tamil -தீபாவளி பண்டிகையையொட்டி விழுப்புரம்- கள்ளக்குறிச்சி மாவட்டத்தில் ரூ.16 கோடிக்கு மதுபானங்கள் விற்பனை செய்யப்பட்டன. இது கடந்த ஆண்டை காட்டிலும் ரூ.2 கோடி கூடுதலாகும்.

விழுப்புரம் மாவட்டத்தில் 122 அரசு டாஸ்மாக் கடைகளும், கள்ளக்குறிச்சி மாவட்டத்தில் 103 டாஸ்மாக் கடைகளும் என ஒருங்கிணைந்த மாவட்டத்தில் 225 டாஸ்மாக் கடைகள் உள்ளன. இந்த கடைகளில் சாதாரண நாட்களில் தினமும் ரூ.2 கோடிக்கும் அதிகமாக பீர், பிராந்தி, விஸ்கி உள்ளிட்ட மதுபானங்கள் விற்பனையாகி வருகின்றன. விழுப்புரம் மாவட்டத்தின் அருகிலேயே புதுச்சேரி மாநிலம் இருப்பதாலும் மற்றும் கள்ளச்சந்தையில் மது விற்பனை போன்றவற்றை தாண்டியும் விழுப்புரம் மாவட்டம் டாஸ்மாக் விற்பனையில் முன்னிலையில் உள்ளது.

பண்டிகை காலங்களில் வழக்கத்தைவிட 2 மடங்கு அல்லது 3 மடங்கு அளவிற்கு மதுபானங்கள் விற்பனை அதிகமாக நடந்து வருகிறது. ரூ.16 கோடிக்கு அந்த வகையில் தீபாவளி பண்டிகையையொட்டி இந்த ஆண்டு மட்டும் ரூ.16 கோடி அளவிற்கு மதுபானங்கள் விற்பனையாகியுள்ளது. அதாவது தீபாவளிக்கு முந்தைய நாளான கடந்த 23-ந் தேதியன்று பிராந்தி, விஸ்கி, பீர் உள்ளிட்ட மது வகைகள் ரூ.7 கோடியே 50 லட்சத்துக்கும், தீபாவளி பண்டிகையான 24-ந்தேதி விஸ்கி உள்ளிட்ட மது வகைகள் 8,571 அட்டைப்பெட்டிகளும், பீர் வகைகள் 4,283 அட்டைப்பெட்டிகளும் விற்று தீர்ந்தன.இதன் மூலம் ரூ.8 கோடியே 46 லட்சத்து 7 ஆயிரத்து 240-க்கு விற்பனையானது. ஆக மொத்தம் 2 நாட்களில் மட்டும் ரூ.15 கோடியே 96 லட்சத்து 7 ஆயிரத்து 240-க்கு மது வகைகள் விற்பனையானது.

கடந்த 2021-ம் ஆண்டு தீபாவளி பண்டிகைக்கு முந்தைய நாளான நவம்பர் 3-ந் தேதியன்று பிராந்தி, விஸ்கி உள்ளிட்ட மது வகைகள் 8,037 அட்டைப்பெட்டிகளும், பீர் வகைகள் 4,670 அட்டைப்பெட்டிகளும் விற்றுத்தீர்ந்தன. இதன் மூலம் ரூ.6 கோடியே 9 லட்சத்து 35 ஆயிரத்து 845-க்கும், தீபாவளி பண்டிகையான நவம்பர் 4-ந் தேதியன்று பிராந்தி, விஸ்கி உள்ளிட்ட மது வகைகள் 9,079 அட்டைப்பெட்டிகளும், பீர் வகைகள் 10,772 அட்டைப்பெட்டிகளும் விற்று தீர்ந்ததன் மூலம் ரூ.7 கோடியே 90 லட்சத்து 29 ஆயிரத்து 130-க்கும் ஆக மொத்தம் 2 நாட்களில் ரூ.13 கோடியே 99 லட்சத்து 64 ஆயிரத்து 975-க்கு மது வகைகள் தான் விற்பனையாகி இருந்தது.

இதனை ஒப்பிடுகையில் கடந்த ஆண்டை காட்டிலும் இந்த ஆண்டு மதுபானங்களின் விற்பனை ரூ.1 கோடியே 96 லட்சத்து 42 ஆயிரத்து 265 அளவிற்கு கூடுதலாக விற்பனையாகியுள்ளதாக விழுப்புரம் மாவட்ட டாஸ்மாக் வட்டாரம் தெரிவித்து உள்ளது குறிப்பிடத்தக்கது.

விழுப்புரம் மாவட்ட எல்லையோரம் புதுச்சேரி இருக்கிறது. இங்கு தமிழகத்தை விட மது பாட்டில்கள் விலை குறைவு. இருந்த போதும் விழுப்புரம் மாவட்டம் மது விற்பனையில் அதிக அளவில் விற்பனை செய்து வருவது குறிப்பிடத்தக்கது.

அடுத்த முக்கியமான செய்திகளை தெரிந்துகொள்ள: Click Here-1, Click Here-2