விழுப்புரம் அருகே 14 அம்ச கோரிக்கை விளக்க விழிப்புணர்வு பிரசார நடைபயணம்

14- அம்ச கோரிக்கைகளை வலியுறுத்தி டெல்லியில் வரும் ஏப்ரல் 5-ந்தேதி நடக்கவுள்ள பேரணியை மக்களிடையே விளக்கும் வகையில் தமிழ்நாடு விவசாயிகள் சங்கம், சி.ஐ.டி.யு, மற்றும் அகில இந்திய விவசாய தொழிலாளர் சங்கம் ஆகியன இணைந்து நாடு முழுவதும் நடைபயண பிரச்சார இயக்கம் நடத்தி வருகின்றனர். இந்நிலையில் சனிக்கிழமை விழுப்புரம் மாவட்டம்,காணை கடை வீதியில் நடைபெற்ற நடைப்பயண நிகழ்ச்சிக்கு தமிழ்நாடு விவசாயிகள் சங்கத்தின் வட்ட செயலாளர் ஏ.நாகராஜன், சி.ஐ.டி.யு .மாவட்ட பொருளாளர் வி.பாலகிருஷ்ணன் ஆகியோர் தலைமை தாங்கினர்.

நிகழ்ச்சியை விக்கிரவாண்டி தொகுதியின் முன்னாள் எம்.எல்.ஏ. ராமமூர்த்தி தொடங்கி வைத்து, கோரிக்கைகளை வலியுறுத்தி நடக்கும் இந்த நடைப்பயணம் ஏன், எதற்காக என்பதை விளக்கி தொடக்கவுரையாற்றினார்.நிகழ்ச்சியில் சி.ஐ.டி.யு. மாவட்ட துணைத்தலைவர் என்.பழனி, தமிழ்நாடு விவசாயிகள் சங்கத்தின் மாவட்ட தலைவர் ஆர்.தாண்டவராயன், மாவட்ட செயலாளர் ஆர்.டி.முருகன், அகில இந்திய விவசாய தொழிலாளர் சங்கத்தின் மாவட்ட செயலாளர் கே.சுந்தரமூர்த்தி,டிஎன்.எம்.எஸ்.ஆர்.ஏ சங்க மாநில துணைச்செயலாளர் ஆர்.கணபதி, தமிழ்நாடு விவசாயிகள் சங்க மாவட்ட பொருளாளர் பி.சிவராமன், அகில இந்திய விவசாய தொழிலாளர் சங்க மாவட்ட பொருளாளர் சங்கர், டாஸ்மாக் சங்க மாநில செயலாளர் ஆர்.கணபதி,டாஸ்மாக் சங்க மாவட்ட தலைவர்வி.சிங்காரவேலு, கட்டுமான தொழிலாளர் சங்க மாவட்ட பொருளாளர் முருகன் ஆகியோர் கலந்து கொண்டு நடைபயணத்தை வாழ்த்தி பேசினர்.

நடைபயணத்தில் தமிழ்நாடு விவசாயிகள் சங்க வட்ட தலைவர் எஸ்.ராஜாராம், வட்ட பொருளாளர் என்.ரங்கநாதன் உட்பட நூற்றுக்கும் மேற்பட்டோர் கலந்து கொண்டு குறைந்தபட்ச ஊதியம் ரூ.25 ஆயிரம் வழங்க வேண்டும், ஓய்வூதியம் ரூ.10 ஆயிரம் வழங்க வேண்டும், ஒப்பந்த முறையை ஒழித்து, ஒப்பந்த தொழிலாளர்களை நிரந்தரப்படுத்த வேண்டும், வேளாண் விளைபொருளுக்கு ஒன்றரை மடங்கு ஆதார விலை வழங்க வேண்டும், விவசாய கடனை தள்ளுபடி செய்யவேண்டும், தொழிலாளர் விரோத சட்ட தொகுப்பு மற்றும் மின்சார திருத்த சட்டத்தை திரும்ப பெற வேண்டும் என்பது உள்ளிட்ட 14- அம்ச கோரிக்கைகளை வலியுறுத்தி கோஷங்களை எழுப்பியவாறு மக்களிடம் விளக்கியவாறு காணையில் தொடங்கிய பேரணி பெரும்பாக்கம், தோகைபாடி, இந்திரா நகர், விழுப்புரம் மாவட்ட ஆட்சியர் பெருந்திட்ட வளாகம் முன்பு முடிவடைந்தது.

பேரணியில் வந்தவர்கள் கோஷங்களை எழுப்பினர். அப்போது சி.ஐ.டி.யு. மாவட்ட செயலாளர் ஆர்.மூர்த்தி கோரிக்கைகளை விளக்கி நிறைவுரையாற்றினார்.