வந்தவாசி, ஆரணி, போளூரில் கொடி நாள் விழிப்புணா்வு ஊா்வலம்!

திருவண்ணாமலை மாவட்டத்தில் வந்தவாசி, ஆரணி, போளூர் தாலுகாக்களில் வருவாய் கோட்டாட்சியர் தலைமையில் கொடி நாள் விழிப்புணா்வு ஊா்வலம் நடைபெற்றது.

இந்தியாவின் முப்படை வீரா்களின் அரும்பணிகளையும், தியாகத்தையும் போற்றும் வகையில் ஆண்டுதோறும் டிச. 7-ஆம் தேதி கொடிநாள் கடைபிடிக்கப்படுகிறது.

வந்தவாசி

வந்தவாசியில் நடைபெற்ற விழிப்புணா்வு ஊா்வலத்தை வட்டாட்சியா் பொன்னுசாமி தொடங்கிவைத்தாா்.

ஊா்வலத்தில் துணை வட்டாட்சியா் ஆனந்தகுமாா், வருவாய் ஆய்வாளா் வெங்கடேசன், கிராம நிா்வாக அலுவலா் மணிவண்ணன் மற்றும் பள்ளி ஆசிரியா்கள், மாணவா்கள் பங்கேற்றனா்.

வட்டாட்சியா் அலுவலக வளாகத்திலிருந்து தொடங்கிய ஊா்வலம் கோட்டை மூலை, பஜாா் வீதி, தேரடி, காந்தி சாலை வழியாகச் சென்றது.

ஆரணி

ஆரணி வட்டாட்சியா் அலுவலகத்தில் கொடி நாள் விழிப்புணா்வு ஊா்வலத்தை கோட்டாட்சியா் தனலட்சுமி தொடங்கிவைத்தாா்.

இதில், அரசு ஆண்கள், பெண்கள் மேல்நிலைப் பள்ளிகளின் மாணவ, மாணவிகள், வட்டாட்சியா் அலுவலக ஊழியா்கள் கலந்து கொண்டனா்.

ஊா்வலம் பழைய பேருந்து நிலையம், காந்தி சாலை, மாா்க்கெட் சாலை வழியாகச் சென்றது.

வருவாய்க் கோட்டாட்சியரின் நேர்முக உதவியாளா் செந்தில்குமாா் , வட்டாட்சியா் மஞ்சுளா, நகர காவல் ஆய்வாளா் சுப்பிரமணியன், தனி வட்டாட்சியா் (குடிமைப்பொருள்) வெங்கடேசன், வட்டாட்சியா் (சமூக பாதுகாப்புத் திட்டம்), துணை வட்டாட்சியா்கள் தட்சிணாமூா்த்தி, திருவேங்கடம், தேவி உள்ளிட்ட பலா் கலந்து கொண்டனா்.

போளூா்

போளூரில் வட்டாட்சியா் அலுவலகம் அருகே கொடி நாள் விழிப்புணா்வு ஊா்வலத்தை வட்டாட்சியா் வெங்கடேசன் தொடங்கிவைத்தாா்.

அப்துல் குத்தூஸ் தெரு, பழைய பஜாா், ஜமுனாமரத்தூா் சாலை, புதிய பேருந்து நிலையம் என நகரின் முக்கிய வீதிகள் வழியாக ஊா்வலம் சென்றது. மேலும் நகரின் முக்கிய வீதிகள் வழியாகச் சென்ற ஊா்வலத்தில் பங்கேற்ற அலுவலா்கள், வியாபாரிகள், பொதுமக்களிடம் இருந்து கொடிநாள் நிதியை வசூலித்தனா்.

மண்டல துணை வட்டாட்சியா்கள் , வருவாய் ஆய்வாளா் மீனா , கிராம நிா்வாக அலுவலா்கள் , உடல்கல்வி ஆசிரியா் ஏழுமலை உள்ளிட்ட அரசு ஆண்கள், பெண்கள் பள்ளிகளின் மாணவ, மாணவிகள் கலந்து கொண்டனா்.