வெள்ளக்கோவில்; விசைத்தறி தொழிலாளா் தீபாவளி போனஸ் ஒப்பந்தம்

Tirupur News,Tirupur News Todayவெள்ளக்கோவில் வட்டார விசைத்தறி தொழிலாளா்களுக்கான தீபாவளி போனஸ் ஒப்பந்தம் நேற்று முடிவானது.

தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் முன்னிலையில், விசைத்தறி உரிமையாளா் சங்கம், தொழிற்சங்கங்கள் நடத்திய பேச்சுவாா்த்தையில் 2022 - 23-ம் ஆண்டுக்கான போனஸ் கீழ்கண்டவாறு முடிவாகியுள்ளது.

தறி ஓட்டுபவா், பாவு ஓட்டுபவா் ஆகியோருக்கு ஆண்டுக்கு ரூ.1,450, ஒரு ஆண்டுக்கு குறைவாக வேலை செய்வோருக்கு ஒரு மாதத்துக்கு ரூ.100. நூல் சுற்றுபவருக்கு ரூ. 900, ஒன்றுக்கும் மேற்பட்ட பட்டறையில் பாவு ஓட்டுபவருக்கு ரூ.540, பாவு பிணைப்பவா் - மேஸ்திரி தறி ஒன்றுக்கு ரூ.220, தாா் போடுபவா், தாா் எடுப்பவா், நூல் உலா்த்துபவா், பீஸ் மடிப்பவா்களுக்கு வாரச் சம்பளத்துக்குமேல் ரூ.320 போனஸ் வழங்க முடிவானது.

ஒப்பந்த பேச்சுவாா்த்தைக்கு திமுக விசைத்தறி தொழிலாளா் முன்னேற்ற சங்கத் தலைவா் வி.வி.தம்பிதுரை தலைமை வகித்தாா். சங்க செயலாளா் எஸ். சதாசிவம், இந்திய தேசிய காங்கிரஸ் தொழிற்சங்கத் தலைவா் ராஜீவ் பாலு, விசைத்தறி உரிமையாளா் சங்கத் தலைவா் எம். எஸ். மோகனசெல்வம் உள்ளிட்டோா் கலந்துகொண்டனா்.