மேலப்பாளையத்தில் 3,250 பேருக்கு தடுப்பூசி: இன்றும் சிறப்பு முகாம்

நெல்லை மாநகராட்சி சார்பில் மேலப்பாளையம் மண்டலத்தில் நடந்த தடுப்பூசி முகாமில் 3,250 பேருக்கு தடுப்பூசிகள் போடப்பட்டது.

நெல்லை மாநகராட்சிப் பகுதிகளில் 35 இடங்களில் தடுப்பூசிகள் போடப்பட்டன. ஒரு முகாமிற்கு 6 பணியாளர்கள் வீதம் 250 பணியாளர்கள் ஈடுபடுத்தப்பட்டனர். இதில் கலெக்டர் விஷ்ணு, கமிஷனர் விஷ்ணுசந்திரன் உத்தரவுப்படி நகர் நல அலுவலர் டாக்டர் ராஜேந்திரன் மேற்பார்வையில் மேலப்பாளையம் மண்டலத்திற்குட்பட்ட பெருமாள்புரம், மேலப்பாளையம் உள்ளிட்ட பகுதிகளில் 3,250 பேருக்கு தடுப்பூசி போடப்பட்டது. பெருமாள்புரத்தில் 2 மொபைல் வாகனங்கள் மூலம் தடுப்பூசி போடப்பட்டது.

இன்றும் தடுப்பூசி முகாம்: நெல்லை மாநகராட்சிப் பகுதியில் 60 இடங்களில் இன்றும் (30ம் தேதி) தடுப்பூசி முகாம் நடத்த ஏற்பாடு செய்யப்பட்டுள்ளது. பொதுமக்கள் ஆர்வமுடன் முகாம்களுக்கு சென்று தடுப்பூசிகளை போட்டுக் கொள்ள வேண்டும் என மாநகராட்சி கமிஷனர் விஷ்ணுசந்திரன், நகர் நல அலுவலர் டாக்டர் ராஜேந்திரன் கேட்டுக் கொண்டுள்ளனர்.