நெல்லை கல்லூரிகளில் முதலாமாண்டு மாணவர்களுக்கு இன்று முதல் நேரடி வகுப்புகள்

நெல்லையில் முதலாமாண்டு கலை கல்லூரி மாணவர்களுக்கு இன்று முதல் நேரடி வகுப்புகள் தொடங்கியது. கொரோனா வழிமுறைகளை பின்பற்றி மாணவர்கள் கல்லூரிகளில் அனுமதிக்கப்பட்டனர்.

தமிழ்நாட்டில் கொரோனா நோய்த்தொற்று குறைந்து வருவதையடுத்து படிப்படியாக பல்வேறு தளர்வுகளை அரசு அறிவித்து வருகிறது. அந்த வகையில் கடந்த செப்டம்பர் 1ம் தேதி முதல் 9ம் வகுப்பு முதல் 12-ஆம் வகுப்பு வரை மாணவர்களுக்கு நேரடி வகுப்புகள் தொடங்கியது. தொடர்ந்து கலை, அறிவியல் கல்லூரிகள் மற்றும் பிற கல்லூரிகளில் முதலாமாண்டு மாணவர்களை தவிர்த்து பிற அனைத்து மாணவர்களுக்கும் நேரடி வகுப்புகள் தொடங்கி நடைபெற்று வருகிறது.

முதலாம் ஆண்டு மாணவர்களுக்கு ஏற்கனவே அட்மிஷன் நடைபெற்று முடிந்தாலும் கூட அரசின் அறிவிப்பு வராதததால் ஆன்லைன் வகுப்புகள் நடைபெற்று வந்தது. இந்த சூழ்நிலையில் இன்று முதல் கலை மற்றும் அறிவியல் கல்லூரி முதலாமாண்டு மாணவர்களுக்கு நேரடி வகுப்புகள் தொடங்கலாம் என்று அரசு அறிவித்ததைத் தொடர்ந்து தமிழ்நாடு முழுவதும் இன்று முதலாம் ஆண்டு மாணவர்களுக்கு வகுப்புகள் தொடங்கியது. அந்த வகையில் நெல்லை மாவட்டத்தில் கலை மற்றும் அறிவியல் கல்லூரி முதலாமாண்டு மாணவர்களுக்கான நேரடி வகுப்புகள் இன்று முதல் தொடங்கியது.

குறிப்பாக தென்னகத்தின் ஆக்ஸ்போர்ட் என்று அழைக்கப்படும் பாளையங்கோட்டையில் உள்ள தனியார் கலைக் கல்லூரிகளில் இன்று காலை முதல் மாணவர்கள் ஆர்வமுடன் கல்லூரிகளுக்கு வந்தனர். அதே சமயம் அரசு உத்தரவுப்படி உரிய வழிமுறைகளைப் பின்பற்றி மாணவர்கள் அனுமதிக்கப்பட்டனர். அதன்படி மாணவர்கள் கட்டாயம் மாஸ்க் அணிந்திருக்க வேண்டும் என்று வலியுறுத்தப்பட்டது. மேலும் கல்லூரி நுழைவு வாசல் முன்பு அனைத்து மாணவர்களும் கைகளை சுத்தம் செய்த பிறகே உள்ளே அனுமதிக்கப்பட்டனர். அதற்கான ஏற்பாடுகளை கல்லூரி நிர்வாகம் செய்திருந்தது.