நெல்லையில் 15வது தமிழ்நாடு குறுநீள தூர மாநில அளவிலான நீச்சல் போட்டி

15- வது தமிழ்நாடு குறுநீள தூர மாநில அளவிலான நீச்சல் போட்டி நெல்லையில் தொடங்கியது. மூன்று நாட்கள் நடக்கும் இந்த மாநிலத்தின் பல்வேறு பகுதிகளில் இருந்து 900 வீரர்கள் மற்றும் வீராங்கனையில் பங்கேற்று உள்ளனர்.

நெல்லை மாவட்ட நீச்சல் கழகம் சார்பில் 2021- ம் ஆண்டிற்கான 15- வது தமிழ்நாடு குறுநீள தூர மாநில அளவிலான நீச்சல் போட்டி நெல்லை பாளையங்கோட்டை அண்ணா விளையாட்டு அரங்கில் இன்று தொடங்கியது. தொடக்க நிகழ்ச்சியில் மாவட்ட ஆட்சியர் விஷ்ணு கலந்து கொண்டு போட்டிகளை தொடங்கி வைத்தார்.

இந்த போட்டியில் நெல்லை, தூத்துக்குடி, கன்னியாகுமரி, விருதுநகர், மதுரை, திண்டுக்கல் உள்ளிட்ட பல்வேறு மாவட்டங்களைச் சேர்ந்த 900 க்கும் மேற்பட்ட வீரர்கள் மற்றும் வீராங்கனைகள் கலந்து கொண்டனர். ஆண்கள், பெண்கள் என இரண்டு பிரிவுகளாக போட்டிகள் நடக்கிறது. முன்னோக்கி நீச்சல், பின்நோக்கி நீச்சல், பட்டர்பிளை நீச்சல் என 100 மீட்டர், 200 மீட்டர், 1500 மீட்டர் என பல்வேறு பிரிவுகளாக போட்டிகள் நடத்தப்படுகிறது.

இன்று தொடங்கிய போட்டிகள் மூன்று நாட்கள் நடக்கிறது. இந்த போட்டிகளில் வெற்றி பெறுபவர்கள் அடுத்த கட்டமாக தேசிய அளவில் நடக்கும் போட்டிகளில் கலந்து கொள்வார்கள்.