திருச்சியில் மாயமான தனியார் வங்கி பெண் ஊழியர்

திருச்சி வயலூர் சாலை சண்முகா நகர் 15-வது கிழக்கு குறுக்கு தெருவை சேர்ந்தவர் செந்தில்குமார் மகள் ரேஷ்மா (வயது 23).

இவர் தில்லைநகர் சாஸ்திரி ரோட்டில் உள்ள தனியார் வங்கியில் கடன் பிரிவில் வேலை செய்து வந்துள்ளார். இந்நிலையில் சம்பவத்தன்று எப்போதும் போல காலையில் வேலைக்கு சென்றவர் மீண்டும் மாலை வீடு திரும்ப வில்லை. இது குறித்து ரேஷ்மாவின் பெற்றோர் பல்வேறு இடங்களில் தேடியும் கிடைக்காததால், உறையூர் போலீசில் ரேஷ்மாவின் தாயார் ஷாமா புகார் கொடுத்தார்.

புகாரின் பேரில் உறையூர் போலீஸ் இன்ஸ்பெக்டர் சண்முகவேல் வழக்கு பதிவு செய்து மாயமான ரேஷ்மாவை தேடி வந்தார். இதற்கிடையே ரேஷ்மா, கன்னியாகுமரி மாவட்டம் மார்த்தாண்டம் பகுதியை சேர்ந்த சுந்தர்ராஜ் மகன் பெல்ஜோராஜ் என்பவருடன் முகநூல் மூலம் பழக்கம் ஏற்பட்டு, இருவரும் காதலித்து வந்ததும் பின்னர் இருவரும் திருமணம் செய்துகொண்டு கணவன் மனைவியாக வாழ்ந்து வருவதும் தெரியவந்தது.

அவர்களை மீட்டு வர உறையூர் போலீசார் நடவடிக்கை எடுத்து வருகிறார்கள்.