திருச்சி வளையல்கார தெரு ஸ்ரீமாரியம்மன் கோவில் பால்குட விழா துவக்கம்

திருச்சி பெரியகடைவீதி பக்கம் உள்ள வளையல் கார தெருவில் அமைந்துள்ளது சக்திமிகு ஸ்ரீ மாரியம்மன் திருக்கோவில். இக்கோவிலில் ஆண்டுதோறும் நடைபெறும் பால்குட விழா மிகவும் சிறப்பு வாய்ந்ததாகும்.

இந்த ஆண்டு 51வது ஆண்டு பால்குட திருவிழா நேற்று தொடங்கியது. நேற்றைய நிகழ்ச்சியில் அப்பகுதி மக்கள் அம்மனுக்கு பூக்களை சாத்தி வழிபாடு செய்தனர். விதவிதமான பூக்கள் அலங்காரத்தில் அம்மன் அப்பகுதி மக்களுக்கு அருள் பாலித்தார். இன்று இரவு குத்துவிளக்கு பூஜை நடைபெறுகிறது.

இதன் தொடர்ச்சியாக வருகின்ற வெள்ளிக்கிழமை காலை சிந்தாமணி காவிரி ஆற்றின் படித்துறையில் இருந்து மேளதாளத்துடன் கரகம் பாலித்து புனித நீர் மற்றும் பால்குடம் எடுத்து வந்து அம்மனுக்கு அபிஷேகம் செய்கிறார்கள். அதன் பின்னர் தீபாராதனை மற்றும் அன்னதானம் நடைபெறுகிறது. விழாவிற்கான ஏற்பாடுகளை மாநகராட்சி முன்னாள் கவுன்சிலரும், திருப்பணி குழு தலைவருமான கே‌.சி. ஆறுமுகம் மற்றும் இளைஞர் குழுவினர் சிறப்பாக செய்துள்ளனர்.