திருச்சி டாக்டர் எம்.ஏ. அலீமிற்கு, மாவட்ட ஆட்சியர் பாராட்டு சான்றிதழ்

திருச்சி மூளை நரம்பியல் துறை டாக்டர் அலீமிற்கு குடியரசு தின விழாவில் பாராட்டு சான்றிதழ் வழங்கப்பட்டது.

திருச்சி கி.ஆ.பெ. விஸ்வநாதம் அரசு மருத்துவக் கல்லூரி முன்னாள் துணை முதல்வர் டாக்டர் எம்.ஏ. அலீம். இவர் சிறந்த மூளை நரம்பியல் துறை நிபுணர் ஆவார். தற்போது திருச்சி ஏ.பி.சி. மருத்துவமனையில் பணியாற்றி வருகிறார். மூளை நரம்பியல் துறையில் பல்வேறு சேவைகள் செய்ததற்காகவும், சமூகப் பணிகளுக்காகவும் இவருக்கு திருச்சி மாவட்ட ஆட்சியரின் பாராட்டு சான்றிதழ் வழங்கப்பட்டுள்ளது.

திருச்சி மாவட்ட காவல் துறை ஆயுதப்படை மைதானத்தில் குடியரசு தின விழா மாவட்ட ஆட்சியர் தலைமையில் கடந்த 26ம் தேதி நடைபெற்றது. இந்த விழாவில் மாவட்ட ஆட்சியர் பிரதீப் குமார் தேசிய கொடி ஏற்றி மரியாதை செய்தார். மேலும் வருவாய் துறை, சமூக நலத்துறை, உள்ளாட்சி நிர்வாக துறை உள்ளிட்ட பல்வேறு அரசு துறைகளில் சிறப்பாக பணியாற்றிய அதிகாரிகள் மற்றும் ஊழியர்களுக்கும் காவல் துறையில் சிறப்பாக பணியாற்றி முதல்வர் பழக்கம் பெற்றவர்களுக்கும் விருதுகளையும் பாராட்டு சான்றிதழ்களையும் மாவட்ட ஆட்சியர் வழங்கினார்.

அப்போது டாக்டர் அலீமிற்கும் இந்த பாராட்டு சான்றிதழ் வழங்கப்பட்டது. டாக்டர் அலிம் தமிழகத்தின் மத்திய மற்றும் தென் மாவட்டங்களில் சிறப்பாக பணியாற்றியதற்காக சமீபத்தில் தான் அமெரிக்க மூளை நரம்பியல் துறை அகாடமி ஃபெல்லோஷிப் விருது வழங்கி கௌரவித்தது என்பது குறிப்பிடத்தக்கது.மேலும் டாக்டர் அலீம் திருச்சி மாவட்ட பொது நலப்பணிகள் நிதி குழுவின் உறுப்பினராகவும் இருந்து பணியாற்றி வருகிறார் என்பது குறிப்பிடத்தக்கது.