திருச்சியில் சிறுமிக்கு திருமணம்- தாலி கட்டிய இளைஞர் தப்பி ஓட்டம்
திருச்சி எடமலைப்பட்டி புதூரை சேர்ந்தவர் லட்சுமணன் (வயது 50).இவரது மகன் வீரமணி என்கிற வாலு(27). இவருக்கும், லால்குடிபகுதியை சேர்ந்த 15 வயது சிறுமிக்கும் திருமணம் நிச்சயிக்கப்பட்டது. கடந்தமாதம் 17-ம் தேதி வீரமணிக்கும், அந்தசிறுமிக்கும் குடும்பத்தார் திருமணம் செய்து வைத்துள்ளனர்.
இந்த நிலையில் திருமண வயதை எட்டாத சிறுமிக்கு திருமணம் நடந்த தகவல் தெரிந்து, திருச்சி மாவட்ட சமூக நல அலுவலர் தமிமுன்னிஷா விசாரணை மேற்கொண்டார். பின்னர் இது குறித்து திருச்சி கண்டோன்மெண்ட் அனைத்து மகளிர் போலீசில் புகார் கொடுத்தார். இந்த புகாரின் பேரில் போலீஸ் இன்ஸ்பெக்டர் ஆனந்தவேத வல்லி வழக்குப்பதிவு செய்து விசாரணை செய்து வந்தார்.
இந்நிலையில் எடமலைபட்டிபுதூரில் உள்ள வீரமணி வீட்டிற்கு இன்ஸ்பெக்டர் ஆனந்த வேதவல்லி தலைமையிலான போலீசார் சென்றனர். சிறுமியின் திருமணத்திற்கு உடந்தையாக இருந்ததாக வீரமணியின் தந்தை லட்சுமணனை போலீசார் கைது செய்தனர். சிறுமிக்கு தாலிகட்டிய வாலிபர் வீரமணி, போலீசார் தேடுவதை அறிந்து தப்பி ஓடிவிட்டார். அவரை போலீசார் தேடி வருகின்றனர்.
இதையடுத்து சிறுமியை மீட்ட போலீசார் திருச்சியில் உள்ள பெண்கள் காப்பகத்தில் அவரை தங்க வைத்து உள்ளனர்.
