இளைஞர் அணி மாநாட்டையொட்டி திருச்சியில் தி.மு.க.வினர் சைக்கிள் பேரணி

சேலத்தில் வருகிற 17-ந்தேதி திமுக இளைஞர் அணி மாநாடு நடைபெற உள்ளது. இது திமுக இளைஞர் அணியின் இரண்டாவது மாநில மாநாடு ஆகும். முதல் மாநில மாநாடு இப்போதைய திமுக தலைவரும், அப்போது திமுக இளைஞர் அணி செயலாளருமாக இருந்த முக ஸ்டாலின் தலைமையில் நடைபெறுகிறது என்பது குறிப்பிடத்தக்கது.

இந்த மாநாடு தற்போது திமுக இளைஞர் அணி செயலாளரும், அமைச்சருமான உதயநிதி ஸ்டாலின் தலைமையில் நடைபெற உள்ளது. இந்த மாநாட்டில் நாடாளுமன்ற தேர்தல் பணிகள், மற்றும் தமிழக அரசியல் நிலவரம் தொடர்பாக பல முக்கிய தீர்மானங்கள் நிறைவேற்றப்பட உள்ளது.

இந்த மாநாடு தொடர்பாக மாநிலம் முழுவதும் கடந்த ஒரு மாத காலமாகவே திமுகவினர் இருசக்கரவாகன பேரணி நடத்தி வருகிறார்கள். அந்த வகையில் இளைஞரணி மாநாட்டிற்காக திருச்சி சிந்தாமணி அண்ணாசிலை அருகில் இன்று சைக்கிள் பேரணி நடைபெற்றது. இந்த சைக்கிள் பேரணியை அமைச்சர் அன்பில் மகேஸ் பொய்யாமொழி தொடங்கி வைத்தார். இதில் மாநகர (கிழக்கு) செயலாளர் மதிவாணன், இளைஞரணி அமைப்பாளர் முத்து தீபக் உள்ளிட்ட ஏராளமானோர் பங்கேற்றனர்.