மினிபஸ் டிரைவருக்கு 2 ஆண்டு சிறைத்தண்டனை விதித்து நீதிமன்றம் தீர்ப்பு

திருச்சி அருகே உள்ள கம்பரசம்பேட்டை பெரியார் நகரைச் சேர்ந்தவர் மணிமாறன் (வயது29). இவர் தனது வீட்டின் அருகில் பெட்டிக்கடை நடத்தி வந்தார்.

கடந்த 30 -12 -2014 அன்று இவர் திருச்சி- கரூர் மெயின் ரோட்டின் அருகில் சாலையோரம் நடந்து சென்று கொண்டிருந்தார். அப்போது அந்த வழியாக வேகமாக வந்த மினி பஸ் அவர் மீது பயங்கரமாக மோதியது .இதில் பலத்த காயமடைந்த மணிமாறன் மருத்துவமனைக்கு கொண்டு செல்லும் வழியில் இறந்தார்.

இதனையொட்டி மினி பஸ் டிரைவர் திருச்சி மாவட்டம் லால்குடியை அடுத்த புதூர் உத்தமனூர் பழனியாண்டி நகரைச் சேர்ந்த செந்தில்குமார் (வயது 32) என்பவரை ஜீயபுரம் போலீசார் கைது செய்து திருச்சி தலைமை குற்றவியல் மாஜிஸ்திரேட்டு கோர்ட்டில் வழக்கு தொடர்ந்தனர்.

இந்த வழக்கை விசாரித்த நீதிபதி சாந்தி குற்றம் சாட்டப்பட்ட செந்தில்குமாருக்கு 2 ஆண்டு சிறைத் தண்டனையும், ரூ .ஆயிரம் அபராதமும் விதித்து தீர்ப்பு கூறினார் .அபராதத் தொகையை கட்ட தவறினால் மேலும் ஒரு மாதம் சிறைத் தண்டனை அனுபவிக்க வேண்டும் எனவும் தீர்ப்பில் குறிப்பிட்டிருந்தார்.இந்த வழக்கில் போலீசார் தரப்பில் அரசு வழக்கறிஞர் ஹேமந்த் ஆஜராகி வாதாடினார்.