திருச்சி ரயில் நிலையத்தில் வடமாநிலத்தை சேர்ந்த 5 சிறுவர்கள் மீட்பு

திருச்சி ஜங்ஷன் ரயில் நிலையத்தில் ரெயில்வே பாதுகாப்பு படை போலீசார் ரோந்து பணியில் ஈடுபட்டனர். அப்போது ஹவுராவில் இருந்து திருச்சி வந்த ரயிலில் சோதனை மேற்கொண்ட போது, சந்தேகப்படும் வகையில் இரயிலில் இருந்த 16 வயதுடைய 2 சிறுவர்கள், 15 வயது சிறுவன் ஒருவன், 14 வயது சிறுவன் ஒருவன், 17 வயது சிறுவன் ஒருவன் என மொத்தம் 5 சிறுவர்கள், ஒரு பெட்டியில் உட்கார்ந்து இருந்தனர்.

உடனே அவர்கள் 5 பேரையும் பிடித்த போலீசார் விசாரணை செய்த போது, அவர்களில் 4 பேர் மேற்குவங்க மாநிலத்தை சேர்ந்தவர்கள் என்பதும், ஒருவர் பீகார் மாநிலத்தை சேர்ந்தவர் என்பதும் தெரியவந்தது. மேலும் இவர்கள் திருப்பூரில் உள்ள ஒரு பனியன் கம்பெனிக்கு வேலைக்காக ரயிலில் புறப்பட்டு வந்தது தெரிய வந்தது. இதைத்தொடர்ந்து 5 பேரையும் மீட்ட ரயில்வே பாதுகாப்பு படையினர், ஒரு காப்பகத்தில் ஒப்படைத்ததுடன், 5 சிறுவர்களின் பெற்றோருக்கும் தகவல் தெரிவித்து வரவழைத்துள்ளனர்.