திருவானைக்காவல் கோவில் அகிலா யானை புதிய குளியல் தொட்டியில் குளித்து குதுாகளிப்பு

திருச்சி:

திருச்சியில் தொடர்ந்து வெப்பம் நிலவி வருவதால் திருவானைக்காவலில் புதிதாக அமைக்கப்பட்ட குளியல் தொட்டியில் கோவில் யானை அகிலா குழந்தை போல் குளித்து குதுாகளித்து மகிழ்ந்தது.

திருச்சி திருவானைக்காவல் ஜம்புகேஸ்வரர் கோவில் அகிலா என்ற பெண் யானை வளர்க்கப்பட்டு வருகிறது. கோவிலில் நடக்கும் சுப நிகழ்ச்சிகள் உள்ளிட்ட அனைத்து விசேஷங்களிலும் அகிலா கலந்துகொள்ளும். பொதுவாக யானைகளுக்கு குளிப்பது என்றால் அலாதி பிரியம். தண்ணீரை பார்த்துவிட்டால் துள்ளி குதிக்க ஆரம்பித்து விடும்.

இந்த வகையில் ஸ்ரீரங்கம் கோவில் ஆண்டாள் யானைக்கு ஷவர் அமைக்கப்பட்டு தினனந்தோறும் குளித்து உடல்சுட்டை தணித்து வருகிறது. அதேபோல், திருச்சி திருவானைக்காவல் ஜம்புகேஸ்வரர் கோவில் யானை அகிலா குளிக்க போதிய வசதிகள் இல்லாத நிலையில் புதிதாக சமீபத்தில் குளியல் தொட்டி அமைக்கப்பட்டது.

கோவில் வளாகத்தில் நாச்சியார் தோட்டம் அருகே 20 அடி நீளம் 20 அடி அகலத்தில் புதிதாக குளியல் தொட்டி கட்டப்பட்டது. இந்நிலையில் இன்று இந்த குளியல் தொட்டியில் நீர் நிரப்பி முதன்முதலாக யானை அகிலா குளித்தது. புதியமுறையில் குளிப்பதால் அகிலா யானை ஆனந்தத்துடன் அனுபவித்து குளித்து மகிழ்ந்தது.