வாலிபர் அடித்துக் கொலை ,போலீஸ் விசாரணை

திருச்சி மாவட்டம் முசிறியில் வாலிபர் அடித்துக் கொலை செய்யப்பட்டார்.

திருச்சி மாவட்டம் , முசிறியில் உள்ள சுண்ணாம்புகாரதெருவைச் சேர்ந்தவர் முருகானந்தம். இவரது மகன் கௌதம் ( 19 ). இவர் தொட்டியம் பகுதியில் உள்ள தனியார் கல்லூரியில் படித்து வந்ததாக கூறப்படுகிறது. இந்நிலையில் கௌதம், முசிறி காவிரி கரையோரம் உள்ள நர்சரி தோப்பு என்ற இடத்தில் தலையில் பலத்த காயத்துடன் சடலமாக கிடந்தார். இது குறித்து அப்பகுதியினர் முசிறி காவல் நிலையத்திற்கு தகவல் தெரிவித்தனர்.

தகவலறிந்த முசிறி போலீஸ் டிஎஸ்பி பிரம்மானந்தம் மற்றும் இன்ஸ்பெக்டர் முத்துக்குமார் ஆகியோர் சம்பவ இடத்திற்கு சென்று வாலிபரின் உடலை கைப்பற்றி திருச்சி அரசு மருத்துவமனைக்கு பிரேத பரிசோதனை செய்வதற்காக அனுப்பி வைத்தனர். வாலிபரின் உடலில் பல இடங்களில் காயம் இருந்ததால் அவரை அடித்து கொலை செய்தவர்கள் யார் என்பது குறித்து போலீசார் தீவிர விசாரணை மேற்கொண்டுள்ளனர்.