திருச்சி சமயபுரம் அருகே வீட்டிற்குள் பிணமாக கிடந்த வாலிபர்

திருச்சி மாவட்டம், சமயபுரம் அருகே உள்ள அண்ணாநகர் மேட்டு தெருவை சேர்ந்தவர் செல்வம். இவரது மகன் மாரிமுத்து (வயது 30). மது பழக்கத்துக்கு அடிமையாகி இருந்துள்ளார். மாரிமுத்து கீழ்தளத்திலும், அவரது பெற்றோர் வீட்டின் மாடியிலும் குடியிருந்து வந்துள்ளனர். இந்நிலையில் இன்று காலையில் மாரிமுத்து தங்கியிருந்த கீழ்தளத்தில் இருந்து துர்நாற்றம் வீசியது. இதைத் தொடர்ந்து கதவை திறந்து பார்த்தபோது மாரிமுத்து அழுகிய நிலையில் பிணமாக கிடந்தார்.

இதைகண்டு அதிர்ச்சி அடைந்த பெற்றோர் இது குறித்து சமயபுரம் போலீஸ் நிலையத்திற்கு தகவல் கொடுத்தனர். அதன்பேரில் சப்-இன்ஸ்பெக்டர் வாசு தேவன் மற்றும் போலீசார் சம்பவ இடத்திற்கு விரைந்து சென்று மாரிமுத்துவின் உடலை கைப்பற்றி பிரேத பரிசோதனைக்காக ஸ்ரீரங்கம் அரசு மருத்துவமனைக்கு அனுப்பிவைத்தனர். மேலும், இதுகுறித்து வழக்குப்பதிவு செய்து அவர் எப்படி இறந்தார் என்பது குறித்து விசாரணை செய்து வருகின்றனர்.