யார் இந்த பாண்டியன் ஐஏஎஸ்? ஆர்வம் காட்டும் தமிழக மக்கள்

பிரதமர் மோடியும் அமித்ஷாவும் விமர்சிக்க தொடங்கிய பின்னர் பாண்டியனை பற்றி அறிந்து கொள்வதில் மக்கள் மிகுந்த ஆர்வம் காட்டி வருகின்றனர்.

1999ல் பாரடிப் புயலினால் அப்போது தான் பேரழிவை சந்தித்திருந்தது ஒடிசா. அந்த சூப்பர் சூறாவளியில் 10000 பேர் பலியனார்கள். அதே ஓடிஷாவில் மிக கடினமான நேரத்தில், தமிழகத்தை பூர்வீகமாக கொண்ட, மிக கடுமையான உழைப்பாளியான பாண்டியன் 2000 ஆம் ஆண்டு ஐஏஎஸ் அதிகாரியாக தனது வாழ்க்கையைத் தொடங்கினார் பாண்டியன்.

2002 ஆம் ஆண்டில், அவர் கலஹண்டி மாவட்டத்தில் உள்ள தரம்கரின் சப்- கலெக்டராக நியமிக்கப்பட்டார், அங்கு விவசாயிகளுக்கான குறைந்தபட்ச ஆதரவு விலையை (MSP) வெற்றிகரமாக செயல்படுத்துவதை உறுதி செய்வதில் அனைவரையும் ஒருங்கிணைத்து பெரும் பங்காற்றினார்.

2004ல், ரூர்கேலாவில் கூடுதல் மாவட்ட மாஜிஸ்திரேட்டாக, பொறுப்பேற்றார். 20 ஆண்டுகளுக்கும் மேலாக திவாலாகியிருந்த ரூர்கேலா மேம்பாட்டு முகமைக்கு (RDA) தலைமையேற்றார். பாண்டியனின் தலைமையில், ஆர்.டி.ஏ., 15 கோடி உபரி லாபம் பார்த்தது. அவர் பொறுப்பேற்ற ஐந்து மாதங்களில், 20 ஆண்டுகளுக்கும் மேலாக காத்திருந்த மக்களுக்கு அவர்கள் பணத்தை திருப்பித் தர முடிந்தது.

2005ல், ஒடிசாவின் மிகப்பெரிய மாவட்டமான மயூர்பஞ்ச் மாவட்ட கலெக்டராக நியமிக்கப்பட்டார். மாற்றுத்திறனாளிகளுக்கு சான்றிதழ்களை வழங்குவதற்காக ஒற்றைச் சாளர முறையை அறிமுகப்படுத்தினார். அதுவரை வருடத்திற்கு 700 சான்றிதழ்கள் வழங்குவது கூட எட்ட முடியாத இலக்காக இருந்தது. தற்போது ஆண்டுக்கு 19000 சான்றிதழ்களாக வழங்கும் அளவு அதிகரித்துள்ளது.

மயூர்பஞ்சில் அவர் செய்த பணிக்காக இந்தியக் குடியரசுத் தலைவரிடமிருந்து தேசிய விருதைப் பெற்றார். மயூர்பஞ்சில் அதன் வெற்றிக்குப் பிறகு, PWD சான்றிதழ்களுக்கான ஒற்றைச் சாளர அமைப்பு தேசிய மாதிரியாக எடுத்துக் கொள்ளப்பட்டு நாடு முழுவதும் செயல்படுத்தப்பட்டது. அந்த நேரத்தில் ஹெலன் கெல்லர் விருதைப் பெற்ற ஒரே அரசு அதிகாரி இவர் தான்.

கஞ்சம் மாவட்ட கலெக்டராக இருந்த போது, பாண்டியன் வாழ்வாதாரத்தை மேம்படுத்தவும், வேலை பாதுகாப்பை வழங்கவும் NREGS ஐ அறிமுகப்படுத்தினார். அவர் முதல் முறையாக ஊதியத்திற்கான வங்கிக் கட்டண முறையைத் தொடங்கினார், மேலும் தொழிலாளர் கொடுப்பனவுகள் நேரடியாக ஊதியம் பெறுபவருக்குச் சென்றடைவதை உறுதிசெய்ய 1.2 லட்சம் வங்கிக் கணக்குகளைத் தொடங்கினார். பாண்டியன் நாட்டின் சிறந்த மாவட்டத்திற்கான NREGSக்கான தேசிய விருதை இரண்டு முறை பெற்றுள்ளார்.

2011 ஆம் ஆண்டில், பாண்டியன் முதலமைச்சர் நவீன் பட்நாயக்கின் தனிச் செயலாளராக நியமிக்கப்பட்டார். அவர் 2023 வரை பதவியில் இருந்தார். 2019 இல், அவர் 5T, (மாற்ற முயற்சிகள்) செயலாளராக நியமிக்கப்பட்டார். அதன் பின்னர் மாநிலத்தின் வளர்ச்சி பெரிய அளவில் மாறியிருந்தது.

ஒடிசாவின் அனைத்து உயர்நிலைப் பள்ளிகளும் ஸ்மார்ட் பள்ளிகளாக மாற்றப்பட்டுள்ளன. முதியோர்களுக்கு மாத ஓய்வூதியமாக ரூ. 1000 வழங்கினார். இளைஞர்களுக்கு ஆண்டு உதவித்தொகையாக ரூ. 10,000 வழங்கினார். மிகவும் சமமான மாநிலமாகப் போற்றப்படும் பெண்கள் இப்போது 0% வட்டியில் 5 லட்சம் வரை கடன் பெறும் வசதிகள் உருவாக்கப்பட்டன. உணவுப் பற்றாக்குறை மாநிலமாக இருந்து, ஒடிசா இப்போது இந்தியாவின் உணவுப் பாதுகாப்பில் மூன்றாவது பெரிய பங்களிப்பாளராக உள்ளது.

500 ஆண்டுகளுக்குப் பிறகு, 5 முறை முதல்வராக இருந்த நவீன் பட்நாயக்கின் கனவான பூரியில் உள்ள ஜெகநாதர் கோயிலை பாரம்பரிய வழித்தடமாக மாற்றியதன் மூலம் நனவாக்கினார். பூரி கோயிலுடன், மாநிலத்தில் உள்ள தேவாலயங்கள், மசூதிகள் மற்றும் கோயில்கள் போன்ற பாரம்பரிய கட்டமைப்புகளின் மாற்றம் மற்றும் பராமரிப்பையும் பாண்டியன் மேற்பார்வையிட்டு வருகிறார்.

இந்திய தேசிய ஹாக்கி அணிக்கு (ஆண்கள் மற்றும் பெண்கள் இருவரும்) ஸ்பான்சர் செய்வதிலிருந்து, தொடர்ந்து இரண்டு முறை ஆண்கள் FIH ஹாக்கி உலகக் கோப்பையை நடத்துவது வரை, ஹாக்கியை மேம்படுத்துவதில் அவர் ஆற்றிய பங்களிப்பிற்காக, பாண்டியன் சர்வதேச ஹாக்கி கூட்டமைப்பின் தலைவரின் விருதைப் பெற்றார்.

அக்டோபர் 2023 இல், பாண்டியன் தனது அதிகாரத்துவப் பொறுப்பிலிருந்து விருப்ப ஓய்வு பெற்றார். மேலும் கேபினட் அமைச்சர் அந்தஸ்தைப் பெற்ற 5T (Transformational Initiatives - மாற்றத்திற்கான முயற்சிகள்) தலைவராக நியமிக்கப்பட்டார்.

தமிழராக இருந்தாலும் அவர் ஒடிசாவின் மருமகன். அவர் திருமணம் செய்தது சுஜாதா IAS என்ற ஒரு ஒடிசாவின் மகளைத் தான். 27 நவம்பர் 2023 அன்று, கட்சித் தலைவரும் ஒடிசா முதலமைச்சருமான நவீன் பட்நாயக் முன்னிலையில் பாண்டியன் முறைப்படி பிஜு ஜனதா தளத்தில் சேர்ந்தார். 23 ஆண்டுகள் ஒரு மாநிலத்திற்காக இரவு பகல் பார்க்காமல் ஒரு இந்தியானாக உழைத்த பாண்டியன், அந்த மாநில மக்கள் போற்றும் ஒரு திறமையான மனிதராக மாறியிருக்கிறார். இவ்வளவு திறமையுள்ள ஒருவர், வேற்று மாநிலத்தில் இவ்வளவு பெரிய பதவியை அடைந்து இவ்வளவு சாதித்து இருப்பதை ஒரு தமிழனாக நினைத்து பெருமைப்படத்தான் வேண்டும்.

இப்போது ஒடிசா மாநில தேர்தல் களத்தில் மிகுந்த முக்கியத்துவத்தை பெற்றுள்ளார் ஒரு தமிழர் என்பது எல்லோருக்கும் பெருமைக்குரிய விஷயம் தானே. பாண்டியனுக்கு ஒடிசா மக்கள் தரும் முக்கியத்துவம் தான் பிரதமரும், உள்துறை அமைச்சரும் அவரை விமர்சிக்கும் அளவு அரசியல் களத்தில் அனலை கிளப்பி உள்ளது.