டெல்டா மாவட்டங்களில் உளுந்து சாகுபடி: வட்டார வேளாண்மை உதவி இயக்குனர் தகவல்

பாபநாசம் வட்டார வேளாண்மை உதவி இயக்குனர் வெளியிட்டுள்ள மோகன் அறிக்கையில் கூறப்பட்டுள்ளதாவது:-

தஞ்சை மாவட்டம் உள்ளிட்ட டெல்டா மாவட்டங்களில் சம்பா மற்றும் தாளடி நெல் அறுவடைக்குபின் நெல் தரிசில் ஜனவரி மாதத்திலிருந்து பிப்ரவரி மாதம் வரை உளுந்து சாகுபடி செய்யப்படுகிறது. இதற்கு ஆடுதுறை 3, ஆடுதுறை 6 உள்ளிட்ட உளுந்து இரகங்கள் விதைக்கப்படுகிறது.

தொடர்ச்சியாக பயிரிடும் இடங்களில் உகந்த மண் ஈரப்பதத்தில் நெற்பயிர் அறுவடை செய்வதற்கு 5 - 10 நாட்கள் முன்னதாக விதைகளை விதைக்க வேண்டும். நெல் அறுவடை இயந்திரத்தின் மூலம் அறுவடை செய்யும் பகுதிகளில் அறுவடை செய்யும் முன் உளுந்து விதைகளை விதைக்க வேண்டும். நெல் தரிசில் உளுந்து விதைக்கும் பொழுது எக்டருக்கு 25 - 30 கிலோ விதை அளவு பயன்படுத்த வேண்டும்.

விதைநேர்த்தி செய்யும் பொழுது ஒரு கிலோ விதைக்கு 4 கிராம் டிரைகோடெர்மா விரிடி அல்லது 10 கிராம் சூடோமோனஸ் அல்லது 2 கிராம கார்பண்டசிம் அல்லது திரம் கொண்டு விதை நேர்த்தி செய்து 24 மணி நேரம் கழித்து விதைக்க வேண்டும். உயிரியல் கட்டுபாட்டு காரணிகளான ரைசோபியம் அல்லது அசோஸ்பைரில்லம் 600 கிராம் விதை நேர்த்தி செய்து விதைக்கலாம். மண்ணின் ஈரப்பதத்தை பொருத்து 10-15 நாள் இடைவெளியில் தண்ணீர் பாய்ச்ச வேண்டும்.

நெல் தரிசில் எக்டேருக்கு 2 % டிஏபி கரைசல் பூக்கும் பருவத்தில் 15 நாட்கள் இடைவெளியில் 2 முறை தெளிக்க வேண்டும். பயறு நுண்ணூட்டம் எக்டருக்கு 5 கிலோ அளவில் அளிப்பதினால் உளுந்தில் ஏற்படும் நுண்ணூட்ட சத்து குறைபாடுகளை சரிசெய்யலாம் . நெல் தரிசில் ஆடுதுறை இரகங்கள் 600-650 குவிண்டால்களும் கோ 4 இரக உளுந்து 600 குவிண்டால்களும் மகசூல் எடுக்கலாம். இவ்வாறு அதில் கூறப்பட்டுள்ளது.