சேலம் : தொடர் குற்றங்களில் ஈடுபட்ட 4 ரவுடிகள் குண்டர் சட்டத்தில் கைது

சேலம் மாநகரப் பகுதிகளில் தொடர் குற்றங்களில் ஈடுபட்டு வரும் நபர்களை, காவல்துறையினர் அதிரடியாக குண்டர் சட்டத்தில் கைது செய்து நடவடிக்கை எடுத்து வருகிறது. சேலம் அன்னதானப்பட்டி காவல் நிலைய எல்லைக்குட்பட்ட பகுதிகளில் வழிப்பறி, கத்தியைக் காட்டி கொலை மிரட்டல் விடுத்தல், அடிதடியில் ஈடுபடுதல் உள்ளிட்ட பல்வேறு குற்றச்செயல்களில் ஈடுபட்டு வந்த மணியனூர் பகுதியை சேர்ந்த வைத்தீஸ்வரன், தாதகாப்பட்டி பகுதியை சேர்ந்த பிரகாஷ் என்பவர் என்ற இருவரையும் குண்டர் சட்டத்தில் கைது செய்யப்பட்டனர்.

இதேபோல், சேலம் பொன்னம்மாப்பேட்டை பகுதியை சேர்ந்த ராஜசேகர் மற்றும் ஜாகிர் அம்மாபாளையம் பகுதியை சேர்ந்த தீனதயாளன் ஆகிய இருவரும் பணம் பறித்தல், வியாபாரிகளிடம் கத்தியை காட்டி கொலைமிரட்டல் விடுதல் மற்றும் மது விலக்கு குற்றங்களில் ஈடுபடுதல் உள்ளிட்ட குற்ற சம்பவங்களில் ஈடுபட்ட இருவரும் கைது செய்யப்பட்டனர்.

இவர்கள் நால்வரும், தொடர் குற்றங்களில் ஈடுபட்டு வந்ததால், குண்டர் தடுப்புக்காவல் சட்டத்தின் கீழ் கைது செய்ய சேலம் மாநகர காவல் ஆணையர் நஜ்மல் ஹோடா உத்தரவிட்டுள்ளார். பின்னர் தடுப்புக்காவல் சட்டத்தில் கைது செய்யப்பட்டனர்.