12 சிறப்பு ரெயில்கள் ரத்து செய்யப்பட்டுள்ளன
சேலம் ரயில்வே கோட்ட அலுவலக அதிகாரிகள் வெளியிட்டுள்ள செய்திக்குறிப்பில், தெலுங்கானா மாநிலம் செகந்திராபாத் ரயில்வே பகுதிக்குட்பட்ட காசிபேட் - பல்கர்ஷா ரயில் நிலையங்களுக்கு இடையே தண்டவாள பகுதியில் பராமரிப்பு பணிகள் நடைபெறுகிறது. இதையொட்டி சேலம் வழியாக செல்லும் கோவை - நிஜாமுதீன் சிறப்பு ரயில் வருகிற 11 மற்றும் 18 ஆகிய தேதிகளில் ரத்து செய்யப்படுகிறது. இதேபோல் நிஜாமுதீன் - கோவை சிறப்பு ரயில் வருகிற 14 மற்றும் 21-ந் தேதிகளிலும், கோரக்பூர் - கொச்சிவேலி சிறப்பு ரயில் 11, 15, 16, 18, 22 மற்றும் 23-ந் தேதிகளிலும், மறுமார்க்கமாக செல்லும் கொச்சிவேலி - கோரக்பூர் சிறப்பு ரயில் 13, 14,18,20 மற்றும் 21-ந் தேதிகளிலும் ரத்து செய்யப்படுகின்றன.
மேலும் பரோனி - எர்ணாகுளம் சிறப்பு ரயில் 12, 19 ஆகிய தேதிகளிலும், மறுமார்க்கத்தில் இருந்து செல்லும் எர்ணாகுளம் - பரோனி சிறப்பு ரயில் 16, 23 ஆகிய தேதிகளிலும், திருவனந்தபுரம் - நிஜாமுதீன் சிறப்பு ரயில் 13, 20 ஆகிய தேதிகளிலும், மறுமார்க்கமாக செல்லும் நிஜாமுதீன் - திருவனந்தபுரம் சிறப்பு ரயில் 16, 23 ஆகிய தேதிகளிலும் ரத்து செய்யப்படுகின்றன. பராமரிப்பு பணிகள் காரணமாக மேற்கூறிய ரயில்கள் உள்பட சேலம் வழியாக செல்லும் 12 சிறப்பு ரெயில்கள் ரத்து செய்யப்பட்டுள்ளன.
