லாரி உரிமையாளர்கள் சங்கம்: வேலை நிறுத்த அறிவிப்பு

வருகின்ற மார்ச் 15 ஆம் தேதி முதல் காலவரையற்ற வேலை நிறுத்தத்தில் ஈடுபட உள்ளதாக தென் மாநில லாரி உரிமையாளர்கள் சங்க கூட்டமைப்பின் பொதுச்செயலாளர் சண்முகப்பா சேலத்தில் அறிவிப்பு. இதற்கு முன்பாக வரும் 26ம் தேதி ஒரு நாள் அடையாள வேலை நிறுத்தத்தில் ஈடுபட போவதாக தெரிவித்துள்ளனர்.

சேலம் மாவட்ட லாரி உரிமையாளர்கள் சம்மேளனம் அலுவலகத்தில் தென் மாநில லாரி உரிமையாளர்கள் சங்க கூட்டமைப்பின் ஆலோசனைக் கூட்டம் நடைபெற்றது. இதன் பின்னர் கூட்டமைப்பின் பொதுச்செயலாளர் சண்முகப்பா செய்தியாளர்களை சந்தித்தார். அப்போது அவர் பேசியது,

மத்திய அரசு டீசல் விலை உயர்வை குறைக்க வேண்டும், டீசல் மீதான மாநில அரசின் வரி விதிப்பை நீக்க வேண்டும் உள்ளிட்ட கோரிக்கையை வலியுறுத்தி தென்மாநில லாரி உரிமையாளர்கள் சங்க கூட்டமைப்பு மார்ச் 15 ஆம் தேதி முதற்கொண்டு காலவரையற்ற வேலை நிறுத்தப்போராட்டத்தில் ஈடுபட முடிவு எடுக்கப்பட்டுள்ளது.

முன்னதாக வரும் 26 ஆம் தேதி ஒரு நாள் அடையாள வேலை நிறுத்ததில் ஈடுபடபோவதாக அறிவித்துள்ளனர். இது குறித்து வரும் மார்ச் 5-ஆம் தேதி பெங்களூரில் நடைபெறும் மாநாட்டில் முடிவு எடுக்கப்பட உள்ளது. மேலும் லாரி உரிமையாளர்கள் முன்வைத்துள்ள 8 கோரிக்கைகளுக்கு மத்திய அரசு தீர்வு காணும்வரை புதிய லாரிகள் வாங்குவதும் இல்லை, இயக்கப் போவதும் இல்லை என்றார். இதனால் தென் மாநிலத்தில் 26 லட்சம் வாகனங்கள் இயங்காது எனவும் கூறியுள்ளனர்.