நீலகிரியில் 5 மாதங்களுக்கு பிறகு திறக்கப்பட்ட சுற்றுலா தலங்கள்

கொரோனா இரண்டாம் அலையின் தடுப்பு நடவடிக்கையாக தமிழகத்திலுள்ள அனைத்து சுற்றுலா தலங்களும் மூடப்பட்டன.

இதன் ஒரு பகுதியான சர்வதேச புகழ்பெற்ற சுற்றுலா தலங்களில் ஒன்றான உதகையில் உள்ள அரசு தாவரவியல் பூங்கா, படகு இல்லம், தொட்டபெட்டா மலை சிகரம் மற்றும் ரோஜா பூங்கா உள்ளிட்ட அனைத்து சுற்றுலா தலங்களும் கடந்த மார்ச் மாதம் முதல் கொரோனா தொற்றின் காரணமாக மூடப்பட்டன.

இந்நிலையில், சுற்றுலாவை நம்பியிருந்த சாலையோர வியாபாரிகள், நடை வியாபாரிகள், வாடகை கார் ஓட்டுநர்கள் மற்றும் சுற்றுலா வழிகாட்டிகள் அனைவரும் தங்களின் வாழ்வாதாரத்தை இழந்து காணப்பட்டனர். இந்நிலையில், தமிழக அரசு இன்று முதல் தளர்வுகளுடன் சுற்றுலா ஸ்தலங்கள் அனைத்தும் திறக்க அனுமதி அளித்துள்ளது. இதனால் அனைத்து சுற்றுலா ஸ்தலங்களிலும் வழிகாட்டு நெறி முறைகள் கண்டிப்பாக கடைபிடிக்க வேண்டும் என தமிழக அரசு உத்தரவிட்டுள்ளது.

இதனால் உதகை அரசு தாவரவியல் பூங்கா, படகு இல்லம், ரோஜா பூங்கா உள்ளிட்ட அனைத்து சுற்றுலா தலங்களிலும் சுற்றுலா பயணிகள் முககவசம் மற்றும் சமூக இடைவெளியினை கட்டாயம் பின்பற்ற வேண்டும் என ஒலிபெருக்கி மூலம் அறிவுறுத்தப்படுகிறார்கள்.

மேலும் அரசு தாவரவியல் பூங்காவில் இதனை கண்காணிக்க 15 பேர் கொண்ட கண்காணிப்பாளர்கள் நியமிக்கப்பட்டுள்ளனர். இன்று முதல் சுற்றுலா தலங்கள் அனைத்தும் திறக்கப்பட்டதால் சுற்றுலா பயணிகள் மட்டுமல்லாமல் வியாபாரிகளும் மகிழ்ச்சியடைந்துள்ளனர்.