முதுமலையில் யானைகள் கொண்டாடிய விநாயகர் சதுர்த்தி விழா: சுற்றுலா பயணிகள் கண்டுகளிப்பு

கொரோனா வைரஸ் பெருந்தொற்று காரணமாக தெப்பக்காடு யானைகள் வளர்ப்பு முகாமில் கடந்தாண்டு எளிமையாக நடைபெற்ற விநாயகர் சதுர்த்தி விழா இம்முறை சுற்றுலா பயணிகள் அனுமதிக்கப்பட்டு கோலாகலமாக கொண்டாடப்பட்டது.

ஆண்டு தோறும் முதுமலை புலிகள் காப்பகத்தில் அமைந்துள்ள தெப்பக்காடு யானைகள் வளர்ப்பு முகாமில் விநாயகர் சதுர்த்தி விழா கோலகலமாக கொண்டாடப்படுவது வழக்கம். அதேபோல் இந்த முறையும் யானைகள் முகாமில் உள்ள 17 வளர்ப்பு யானைகள் விநாயகர் சதுர்த்தியை கொண்டாடின. அலங்கரிக்கப்பட்டு உணவு உண்ணும் மாடத்திற்கு யானைகள் அழைத்து வரப்பட்டன.

பின்பு யானைகள் முகாம் வளாகத்தில் உள்ள விநாயகர் கோவிலில் கிருஷ்ணன் மற்றும் மசினி என்ற இரு யானைகள் மணி அடித்தவாறு மூன்று முறை கோவிலை சுற்றி வந்து மண்டியிட்டு காலை உயர்த்தி பிளறி விநாயகரை வழிபட்டன இதை சுற்றுலா பயணிகள் பிரமிப்புடன் கண்டு ரசித்தனர். பின்பு யானைகளுக்கான சத்து மாவு, பழங்கள், கரும்பு, கேள்வரகு உள்ளிட்ட அறுசுவை உணவுகள் வழங்கப்பட்டன.

இந்த விழாவில் முதுமலை புலிகள் காப்பக வனத்துறை அதிகாரிகள் மற்றும் வன ஊழியர்கள் பலர் கலந்து கொண்டனர். மேலும் கொரோனா வைரஸ் தொற்று காரணமாக கடந்த ஆண்டு சுற்றுலா பயணிகள் அனுமதியின்றி எளிமையாக நடைபெற்ற விநாயகர் சதுர்த்தி விழா இம்முறை தமிழக அரசு தளர்வுகளுடன் பொது ஊரடங்கு அறிவித்த நிலையில் முதுமலை தெப்பக்காடு யானைகள் முகாமில் ஏராளமான சுற்றுலா பயணிகள் வருகை புரிந்து விநாயகர் சதுர்த்தி விழாவை கண்டு ரசித்தனர்.

மேலும் ஒவ்வொரு சுற்றுலா பயணிகள் கூறும்போது கொரோனாவால் கடந்த ஒன்றரை வருடங்களாக சுற்றுலா தலங்களுக்கு செல்ல முடியாமல் இருந்த நிலையில் இந்த முறை விநாயகர் சதுர்த்தி தினத்தில் முதுமலையில் யானைகள் கொண்டாடிய இந்த விழாவை காண்பது பெரும் மகிழ்ச்சியாக உள்ளதென தெரிவித்தனர்.