நாய்கள் கடித்து தாய் ஆடு, 3 குட்டி ஆடுகள் உயிரிழப்பு

பள்ளிபாளையம் அடுத்துள்ள நல்லா கவுண்டம்பாளையம் என்ற பகுதி அருகே நாய்கள் கடித்துக் குதறியதில் மூன்று குட்டி ஆடு ஒரு தாய் ஆடு என நான்கு ஆடுகள் பலியான சம்பவம் அப்பகுதியில் சோகத்தை ஏற்படுத்தியுள்ளது

நாமக்கல் மாவட்டம் பள்ளிபாளையம் அடுத்துள்ள ஆனங்கூர் ஊராட்சிக்கு உட்பட்ட நல்லா கவுண்டம்பாளையம் பகத்சிங் நகர் பகுதியை சேர்ந்தவர் கோபி. இவர் தனக்கு சொந்தமான காட்டில் கால்நடைகளை வளர்த்து வருகிறார்..

சுமார் பத்துக்கும் மேற்பட்ட ஆடுகளை மேய்ச்சலுக்கு விட்டிருந்த நிலையில், ஆடுகளின் கதறல் சத்தம் கேட்டு வீட்டை விட்டு வெளியே வந்து கோபி பார்த்தபொழுது, அப்பகுதியை சுற்றி திரியும் தெரு நாய்கள் மூன்று குட்டி ஆடு மற்றும் ஒரு தாய் ஆடு உள்ளிட்ட நான்கு ஆடுகளை கடித்து குதறியதை கண்டு அதிர்ச்சியடைந்து நாய்களை விரட்ட முயன்றார்.

அதற்குள்ளாகவே ஆடுகளை கடித்து குதறிய நாய்கள் அங்கிருந்து தப்பி ஓடியது. இதனை அடுத்து கோபி, ஆடுகள் அருகில் சென்று பார்த்த பொழுது குடல் சரிந்து உயிரிழந்ததைக் கண்டு அதிர்ச்சி அடைந்தார்.

இது குறித்து தகவல் அறிந்த கிராம நிர்வாக அலுவலக அதிகாரி உள்ளிட்டோர் நேரில் சென்று விசாரணை மேற்கொண்டனர். மேலும் இது குறித்து கோபி கூறும் பொழுது, நல்லா கவுண்டம்பாளையம் சுற்றுவட்டார பகுதியில், ஏராளமான கால்நடைகளை விவசாயிகள் வளர்த்து வருகின்றனர்.. இந்நிலையில் அளவுக்கு அதிகமான நாய்கள் இப்பகுதியில் சுற்றித் திரிவதால், கால்நடைகளுக்கு பாதுகாப்பு இல்லாத நிலை ஏற்பட்டுள்ளது. அவ்வப்போது இது போன்ற சம்பவங்கள் நடைபெற்று வருகிறது. தற்போது இன்று காலை பகல் நேரத்திலேயே என்னுடைய ஆடுகளை இப்பகுதியில் உள்ள தெருநாய்கள் கடித்து குதறி உள்ளது. இனிவரும் காலங்களில் இது போன்ற சம்பவங்கள் நடக்காமல் இருக்க அரசுத்துறை அதிகாரிகள் மற்றும் வருவாய் துறை அதிகாரிகள் உரிய நடவடிக்கை எடுக்க வேண்டும் என கேட்டுக்கொண்டார்.

மேலும் பட்டப் பகலில் வீட்டின் முன் கட்டப்பட்டிருந்த ஆடுகளை நாய்கள் கடித்துக் குதறிய சம்பவம் நல்லா கவுண்டம்பாளையம் பகுதியில் விவசாயிகள் மத்தியில் அதிர்ச்சியை ஏற்படுத்தியுள்ளது.