பெண் பயணிகளை பேருந்தில் ஏறவிடாமல் தடுப்பு: வீடியோ வைரலானதால் அதிகாரிகள் ஆறுதல்

குமாரபாளையத்தில் பெண் பயணிகளை அரசு பஸ்களில் ஏறவிடாமல் தடுக்கும் நடத்துனர்களின் செயல்களை கண்டு ஆதங்கப்பட்டு, சமூக வலை தளங்களில் பகிரப்பட்ட பெண்ணின் வீடியோவால் போக்குவரத்து அலுவலர்கள் போன் மூலமும் மற்றும் நேரிலும் ஆறுதல் கூறினர்.

இதுகுறித்து குமாரபாளையம் அருகே பள்ளிபாளையம் சாலையில் எம்.ஜி.ஆர்.நகர் பஸ் நிறுத்தம் அருகே பேன்சி ஸ்டோர் நடத்தி வரும் காளிதேவி, 28. கூறுகையில், இந்த பஸ் நிறுத்தத்தில் அரசு பஸ்கள் நின்றதும் பெண் பயணிகள் ஏற முயற்சித்தனர். அவர்களை ஏற்ற முடியாது என்று கூறி, பஸ்ஸை இயக்கி சென்றனர்.

இது போல் பல முறை நடந்துள்ளதாக ஏராளமானோர் என்னிடம் புகார் தெரிவித்துள்ளனர். ஆகவே இது குறித்து ஆத்திரமடைந்து அரசு பஸ் நடத்துனர்களிடம் கேட்டதற்கு, டெப்போவிற்கு போய் புகார் சொல்லுங்கள் என ஏளனமாக தெரிவித்தனர். செய்வதறியாது, நானே வீடியோ எடுத்து அதை சமூக வலை தளங்களில் பகிர்ந்தேன். இந்த வீடியோவுக்கு பலரும் நான் கேட்டது சரி என்று ஆதரவு தெரிவித்தனர்.

இதனை கண்ட நகர தி.மு.க. பொறுப்பாளர் செல்வம், இது குறித்து பள்ளிபாளையம் போக்குவரத்து பணிமனை அலுவலர் வடிவேலுவிடம் தெரிவித்தார். அவர் நேர காப்பாளர் வெங்கடாசலத்திற்கு தெரிவிக்க, அவர் என்னை நேரில் சந்தித்து இனி இது போல் நடக்காது; அவ்வாறு நடக்கும் ஓட்டுனர், நடத்துனர்கள் மீது கடும் நடவடிக்கை எடுக்கப்படும் என உறுதியுடன் தெரிவித்ததாக அவர் கூறினார்.

அப்போது தி.மு.க. நிர்வாகிகள் ரவி, கந்தசாமி உள்பட பலர் உடனிருந்தனர்.