குமாரபாளையம் விடியல் ஆரம்பம் சேவை சங்கம் சார்பில் வேலை வாய்ப்பு முகாம்
குமாரபாளையத்தில் விடியல் ஆரம்பம் சார்பில் வேலை வாய்ப்பு முகாம் நடந்தது.
குமாரபாளையத்தில் விடியல் ஆரம்பம் சேவை சங்கம் சார்பில் வேலை வாய்ப்பு முகாம் நடந்தது.
நாமக்கல் மாவட்டம் குமாரபாளையத்தில் விடியல் ஆரம்பம் சேவை சங்கம் சார்பில் வேலை வாய்ப்பு முகாம் நடந்தது. தி.மு.க. முன்னாள் நகர துணை செயலாளர் ரேவதி, அரசு உதவி பெறும் சி.எஸ்.ஐ. நடுநிலைப்பள்ளி தலைமையாசிரியை சுகந்தி, சமூக சேவகி சித்ரா, இல்லம் தேடி கல்வி ஜமுனா, சித்ரா ஆகியோர் குத்துவிளக்கேற்றி முகாமை துவக்கி வைத்தனர். 60-க்கும் மேற்பட்ட தனியார் வேலை வாய்ப்பு நிறுவனங்கள் தங்கள் நிறுவனங்களுக்கு தேவைப்படும் ஆட்களை தேர்வு செய்ய நேர்முகத் தேர்வை நடத்தினர் 400-க்கும் மேற்பட்ட இளைஞர்கள் பங்கேற்றனர். தேர்வு செய்யப்பட்ட 154 பயனாளிகளுக்கு பணி ஆணைகளை விடியல் ஆரம்பம் நிறுவனர் பிரகாஷ், தொழிலதிபர் கோபாலகிருஷ்ணன், பஞ்சாலை சண்முகம், ரெயின்போ கணேஷ்குமார், தீனா ஆகியோர் வழங்கினார்கள்.
குமாரபாளையம் அரசு உதவி பெறும் சி.எஸ்.ஐ நடுநிலைப் பள்ளியில் விடியல் ஆரம்பம் சார்பில் மாலை நேர வகுப்பு துவக்க விழா, போட்டியில் வெற்றி பெற்றவர்களுக்கு பரிசளிப்பு விழா நடத்தப்பட்டது. காந்தியின் திருவுருவப்படத்திற்கு மலர்மாலை அணிவித்து மரியாதை செலுத்தப்பட்டது. சிறப்பு விருந்தினராக குமாரபாளையம் இன்ஸ்பெக்டர் தவமணி பங்கேற்று, மகாத்மா காந்தி மாலை நேர பயிலக கல்வி வகுப்பை துவக்கி வைத்தார்.
இந்நிகழ்வில் இன்ஸ்பெக்டர் தவமணி பேசியதாவது:-
அனைவருக்கும் தரமான கல்வி கிடைப்பதற்கு அரசு முழு முயற்சி எடுத்து வருகிறது. கல்வித் தரம் உயர்ந்து வருவதால் அரசு பள்ளிகள் சிறப்பாக செயல்பட்டு வருகிறது. அதன் மூலம் உலக அளவில் நமது கல்வியாளர்கள் உயர்ந்து வருகிறார்கள். ஆகவே இந்த மாலை நேர பயிலகத்தை நன்றாக பயன்படுத்திக் கொள்ளுங்கள்.
இவ்வாறு அவர் பேசினார்.
பேச்சு, கட்டுரை, ஓவியம், வினாடி வினா போட்டிகள் வைக்கப்பட்டது. இதில் வெற்றி பெற்ற மாணவ, மாணவியர்களுக்கு இன்ஸ்பெக்டர் தவமணி, ஆசிரியை ஹெலன், பஞ்சாலை சண்முகம் பரிசுகள் வழங்கினர். முன்னதாக பள்ளியிலிருந்து ஊர்வலமாக சென்று மகாத்மா காந்தியின் திருவுருவச்சிலைக்கு மலர் மாலை அணிவித்து, காந்தி வழியில் நடப்போம் என மாணவ, மாணவியர்கள் உறுதிமொழி ஏற்றனர். மாலை நேர பயிற்சி ஆசிரியைகள் ராணி மற்றும் சித்ராவிற்கு தலைமை ஆசிரியை சுகந்தி பொன்னாடை அணிவித்து கவுரவப்படுத்தினார்.
இந்த விழாவில் தீனா, ஜமுனா மற்றும் ராம்கி மற்றும் உதவி கரம் அங்கப்பன் உள்பட பலர் பங்கேற்றனர்.
