குமாரபாளையத்தில் தெருநாய்கள் தொல்லை... பொதுமக்களுக்கு நிம்மதி இல்லை!
கும்பலாக சுத்துவோம்... வாகனங்களை துரத்துவோம்...! பொதுமக்களை அச்சுறுத்தும் தெருநாய்கள் சங்கமத்திருக்கும் இடம், குமாரபாளையம் வட்டாட்சியர் அலுவலகம் அருகே.
“ஊரடங்கால ஜன நடமாட்டம் இல்ல. வா தெருவிலே பயமில்லாம நாம சுற்றலாம்” என்று சக நாய்கள் உலா வருகின்றனவோ? இடம்: குமாரபாளையம்
நாமக்கல் மாவட்டம் குமாரபாளையம் பகுதியில், தெரு நாய்களின் தொல்லை அதிகரித்து வருகிறது. குறிப்பாக, தாலுக்கா அலுவலகம் பின்புறம் மேற்கு காலனி பகுதியில், அதிகம் குடியிருப்பு பகுதியில், நாய்கள் கூட்டமாக திரிகின்றன.
இதனால் இரவு நேரத்தில் வாகனம் ஓட்டி வரும் பொதுமக்கள், நடந்து செல்வோரை, தெரு நாய்கள் கூட்டமாக சூழ்ந்து கொண்டு துரத்துகின்றன. இதனால், பொதுமக்கள் அலறியடித்து ஓட்டம் பிடிக்க வேண்டியிருக்கிறது. குறிப்பாக, தனியே வரும் குழந்தைகளுக்கு, இந்த நாய்களால் ஆபத்து ஏற்படும் வாய்ப்புள்ளது.
எனவே பொதுமக்கள், வாகன ஓட்டிகளை அச்சுறுத்தி வரும் தெரு நாய்களை கட்டுப்படுத்த, குமாரபாளையம் நகராட்சி நிர்வாகம் உடனடியாக நடவடிக்கை எடுக்க வேண்டும் என்று, பொதுமக்கள் வேண்டுகோள் விடுத்துள்ளனர்.
