மதுரை சாத்தமங்கலம் சிறுபான்மையினர் மாணவிகள் விடுதி: அமைச்சர் செஞ்சிமஸ்தான் ஆய்வு
மதுரை சாத்தமங்கலம் சிறுபான்மையினர் மாணவியர் விடுதியை சிறுபான்மையினர் நலன் மற்றும் வெளிநாடுவாழ் தமிழர் நலத்துறை அமைச்சர் செஞ்சி மஸ்தான் ஆய்வு செய்தார்.
பின்னர், செய்தியாளர்களிடம் அமைச்சர் செஞ்சி மஸ்தான் கூறியதாவது: தமிழகத்தில் உள்ள இலங்கை அகதிகள் முகாமில் வசிக்கும் அகதிகளுக்காக புதிய வீடுகள் கட்டி தரப்படும். கடந்த 2 மாதங்களில், வெளிநாடுகளில் 32 தமிழர்கள் இறந்து உள்ளனர். 32 பேரில், 30 பேரின் உடல்கள் தமிழகத் துக்கு கொண்டு வரப்பட்டுள்ளது. தமிழகத்தில், 13,553 இலங்கை அகதிகள் குடும்பங்கள் அகதி முகாமுக்கு, வெளியே வசித்து வருகின்றனர்.
தமிழகத்தில் உள்ள இலங்கை அகதிகளுக்கு குடியுரிமை வழங்க வேண்டும் என மத்திய அரசை, தமிழக அரசு தொடர்ந்து வலியுறுத்தி வருகிறது. தமிழகத்தில் உள்ள இலங்கை அகதிகளுக்கு சட்ட ரீதியாக இந்திய குடியுரிமை பெற்று தர தமிழக அரசின் சார்பில் சிறப்பு குழு அமைக்கப்படும்.அதிமுக சரியாக ஆட்சி புரியததால், மக்கள் திமுகவை தேர்வு செய்துள்ளனர் என்றார் அமைச்சர்.
பின்னர், கொரோனா தடுப்பூசி மையத்தினை ஆய்வு செய்த அமைச்சர், டாக்டர்கள் மற்றும் நோயாளிகளிடம் கொரோனா தடுப்பூசி போட்டுக்கொள்வதன் அவசியம் குறித்து பேசினார். பொதுமக்கள், மருத்துவர்கள் பாதுகாப்பாக இருக்க வேண்டும் என அறிவுறுத்தினார் . இந்த ஆய்வில், மாவட்ட ஆட்சியர் அனீஷ் சேகர், மாநகராட்சி ஆணையர் கார்த்திகேயன், சட்டமன்ற உறுப்பினர்கள் பங்கேற்றனர்.
