சிறுமி கடத்தல் வழக்கு: 2 பேருக்கு 10 ஆண்டு சிறை விதிப்பு

கிருஷ்ணகிரி பகுதியை சேர்ந்தவர் 17 வயது சிறுமி. கடந்த 2018ம் ஆண்டு மே மாதம், அவர் மாயமானார். இது குறித்து சிறுமியின் பெற்றோர் கிருஷ்ணகிரி அனைத்து மகளிர் போலீசில் புகார் செய்தனர். அதன் பேரில், போலீசார் விசாரணை நடத்தினார்கள்.

இதில் காவேரிப்பட்டணம் அருகே உள்ள தேவர்முக்குளத்தைச் சேர்ந்த சேகர் என்பவர், அந்த சிறுமியை கடத்தி சென்றதும், ஓசூர் தொரப்பள்ளியை சேர்ந்த முருகன் என்பவர் அதற்கு உடந்தையாக இருந்ததும் தெரிய வந்தது. இதைத் தொடர்ந்து அவர்கள் 2 பேரையும் போலீசார் கைது செய்தனர்.

இந்த வழக்கு கிருஷ்ணகிரி விரைவு மகளிர் நீதிமன்றத்தில் நடந்து வந்தது. வழக்கை விசாரித்த நீதிபதி லதா தீர்ப்பு வழங்கினார். அதன்படி குற்றம் சாட்டப்பட்ட சேகருக்கு 15 ஆண்டுகள் சிறை தண்டனையும், ரூ.15 ஆயிரம் அபராதமும், முருகனுக்கு 10 ஆண்டுகள் சிறை தண்டனையும், ரூ.10 ஆயிரம் அபராதமும் விதித்து தீர்ப்பு கூறினார். இவ்வழக்கில் அரசு தரப்பில் வக்கீல் கலையரசி ஆஜர் ஆகி வாதாடினார்.