கவுந்தப்பாடி அருகே விவசாயிகள் மறியல்

கவுந்தப்பாடி அருகே தெருநாய்கள் தாக்கி ஆடுகள் உயிரிழப்பு - நடுரோட்டில் மறியல்

கோபி: கவுந்தப்பாடி அருகே பாப்பாங்காட்டூரைச் சேர்ந்த 42 வயதான விவசாயி கார்த்தியின் தொழுவத்தில் கட்டப்பட்டிருந்த ஆடுகள் தெருநாய்களால் தாக்கப்பட்டு இறந்த சம்பவம் பெரும் அதிர்ச்சியை ஏற்படுத்தியுள்ளது.

கார்த்தி தனது தோட்டத்தில் ஆடுகள் வளர்த்து வருகிறார். நேற்று காலை அவர் தோட்டத்திற்குச் சென்றபோது, தொழுவத்தில் கட்டப்பட்டிருந்த எட்டு வெள்ளாடுகள் இறந்து கிடந்ததையும், மற்றொரு ஆடு உயிருக்குப் போராடிக் கொண்டிருந்ததையும் கண்டு அதிர்ச்சியடைந்தார்.

இச்சம்பவத்தால் பெரும் பொருளாதார இழப்பைச் சந்தித்த கார்த்தியும் அப்பகுதி மக்களும் இறந்த ஆடுகளை ஈரோடு பிரதான சாலையான ஐய்யம்பாளையம் பிரிவில் வைத்து நேற்று காலை 9:45 மணியளவில் சாலை மறியலில் ஈடுபட்டனர். அவர்கள் இறந்த ஆடுகளுக்கு இழப்பீடு வழங்க வேண்டும் என்றும், ஆடுகளைக் கொல்லும் தெருநாய்களைக் கட்டுப்படுத்த வேண்டும் என்றும் கோரிக்கை வைத்து கோஷங்கள் எழுப்பினர்.

சுமார் 30க்கும் மேற்பட்டோர் இந்த மறியலில் பங்கேற்றனர். உடனடியாக சம்பவ இடத்திற்கு விரைந்த கவுந்தப்பாடி காவல்துறையினரும் வருவாய்த்துறை அதிகாரிகளும் பேச்சுவார்த்தை நடத்தி, இழப்பீடு வழங்குவது குறித்து உரிய நடவடிக்கை எடுப்பதாக உறுதியளித்தனர். இதையடுத்து காலை 10:15 மணியளவில் போராட்டக்காரர்கள் கலைந்து சென்றனர்.