அரசு மருத்துவமனையில் கட்டுமான பணிகள் தீவிரம்

கவுந்தப்பாடி அரசு மருத்துவமனையில் புதிய கட்டட கட்டுமான பணிகள் தீவிரம்

கவுந்தப்பாடி அரசு மருத்துவமனை வளாகத்தில், மருத்துவ சேவைகளை மேம்படுத்தும் நோக்கில், கூடுதல் கட்டடம் கட்டும் பணிகள் தீவிரமாக நடைபெற்று வருகின்றன. 1993ல் நிறுவப்பட்ட இந்த அரசு மருத்துவமனை, 1.32 ஏக்கர் பரப்பளவில் பல்வேறு பிரிவுகளுடன் செயல்பட்டு வருகிறது. தற்போதைய தலைமை மருத்துவர் ஆனந்தன் தலைமையில், நான்கு மருத்துவர்கள் சேவையாற்றி வருகின்றனர்.

மருத்துவ சேவைகளை விரிவுபடுத்த, மகப்பேறு மற்றும் குழந்தைகள் மருத்துவ பிரிவுக்கு எதிரே இருந்த பழைய கட்டடம் அகற்றப்பட்டு, அதற்குப் பதிலாக புதிய கட்டடம் அமைக்கும் திட்டம் முன்வைக்கப்பட்டது. இந்த திட்டத்தின் கீழ், கடந்த 2024, டிசம்பர் 20ஆம் தேதி, தமிழக முதல்வர் மு.க. ஸ்டாலின் 3.50 கோடி ரூபாய் மதிப்பில் புதிய கட்டட பணிகளுக்கான அடிக்கல் நாட்டினார்.

தற்போது அங்கு நில மட்டத்தை சமப்படுத்தி, அடிக்கலுக்கு தேவையான தோண்டல் பணிகள் தீவிரமாக நடைபெற்று வருகின்றன. இந்த புதிய கட்டடம், விபத்து மற்றும் தீவிர சிகிச்சை பிரிவு, ரத்த சேமிப்பு வங்கி, மருத்துவ காப்பீடு பிரிவு, ஸ்கேனிங் பிரிவு மற்றும் பச்சிளங்குழந்தைகள் பிரிவுக்காக உருவாக்கப்படுகிறது.

இந்த கட்டுமான பணிகள் 2025 ஆகஸ்ட் மாதத்திற்குள் முடிக்க பொதுப்பணித்துறையின் மூலம் ஒப்பந்தம் செய்யப்பட்டுள்ளதாக அதிகாரிகள் தெரிவித்துள்ளனர். புதிய கட்டடம் உருவான பிறகு, கவுந்தப்பாடி மருத்துவமனை, சுற்றுவட்டார மக்களுக்கு மேலும் சிறந்த சுகாதார சேவைகளை வழங்கும் என எதிர்பார்க்கப்படுகிறது.