ஊக்கத்தொகை பெறும் விவசாயிகளுக்கு முக்கிய அறிவிப்பு

ஊக்கத்தொகை பெறும் விவசாயிகளுக்கு முக்கிய அறிவிப்பு – தரவுகள் இணைக்க கடைசி தேதி ஏப்ரல் 8

ஈரோடு மாவட்ட வேளாண் இணை இயக்குனர் தமிழ்செல்வி வெளியிட்ட செய்திக்குறிப்பில், மாவட்ட வேளாண் அடுக்ககம் திட்டத்தின் கீழ் விவசாயிகளின் தரவுகளை சேகரித்து தனித்துவ அடையாள எண் (Unique ID) பதிவு செய்யும் பணி நடைபெற்று வருவதாக தெரிவிக்கப்பட்டுள்ளது. இந்த பணிகள், அனைத்து பொது சேவை மையங்களில் (Common Service Centers) இலவசமாக மேற்கொள்ளப்படுகின்றன.

பிரதம மந்திரி கிசான் சம்மான் நிதி (PM-Kisan) ஊக்கத்தொகையை தொடர்ந்து பெறவும், வேளாண்துறை வழங்கும் பல்வேறு திட்டங்களின் பயன்களை பெறவும், விவசாயிகள் இந்த தனித்துவ அடையாள எண்ணைப் பெற்றிருக்க வேண்டும். தற்போது, 51,976 விவசாயிகள் இத்திட்டத்தின் கீழ் தங்கள் எண்ணை பெற முடித்துள்ளனர்.

இன்னும் இதுவரை பதிவு செய்யாத விவசாயிகள், தங்கள் விவரங்களை உடனடியாக இணைத்து தனித்துவ அடையாள எண்ணைப் பெற வேண்டும். இதற்கான கடைசி தேதி ஏப்ரல் 8 ஆகும். இந்த நேரக்கெடு கடந்துவிட்டால், அவர்கள் PM-Kisan திட்டத்திலிருந்து ஊக்கத்தொகை பெற முடியாமல் போக வாய்ப்பு உள்ளது. எனவே, அனைத்து விவசாயிகளும் விரைவாக தேவையான நடவடிக்கைகளை மேற்கொண்டு, அரசின் பலன்களை பெறும் வகையில் பதிவு செய்யுமாறு கேட்டுக்கொள்ளப்படுகிறது.