இழப்பீடு வழங்கும் முன் மரங்களை வெட்டிய அரசு அதிகாரிகள்: விவசாயி குமுறல்

திண்டுக்கல் மாவட்டம், கொடை ரோடு அருகே, உரிய இழப்பீடு வழங்கும் முன்பே விவசாயி வளர்த்து வந்த, செம்மரங்களை வனத்துறையினர், தேசிய நெடுஞ்சாலை துறையினர் வெட்டியுள்ளனர்.

ஜல்லிபட்டி பிரிவு அருகே புதிய 4 வழிச்சாலை அமைக்க, இடையூறாக இருந்த, 8 செம்மரங்களை அகற்ற நில எடுப்பு அதிகாரிகள் முடிவு செய்தனர். ஆனால், இழப்பீடாக ரூபாய் 80 இலட்சம் வழங்க வலியுறுத்தி, விவசாயி ஜெயக்குமார் போராடி வந்தார். ஆனால், தேசிய நெடுஞ்சாலைத்துறையினர், ரூபாய் 4 லட்சம் மட்டுமே, இழப்பீடு வழங்குவதாக கூறி வந்தனர்.

இந்நிலையில், திங்கள்கிழமை திடீரென, மாவட்ட உயர் அதிகாரிகள் உத்தரவு எனக்கூறி வனத்துறையினர், காவல்துறையினர் உதவியுடன், 30-க்கும் மேற்பட்ட தேசிய நெடுஞ்சாலை துறையினர், செம்மரங்களை வெட்டி அகற்றினார். உரிய இழப்பீடு வழங்காமல், தேசிய நெடுஞ்சாலைத்துறை அதிகாரிகள் மரங்களை வெட்டி சாய்த்த போது விவசாயி ஜெயக்குமார் மற்றும் குடும்பத்தினர் தடுக்க முயன்றனர் இருப்பினும் செம்மரங்களை வெட்டி சாய்த்தனர்.