பாலக்கோடு அருகே போலி மதுபான தொழிற்சாலை நடத்திய 3 பேர் கைது

தர்மபுரி மாவட்டம், மாரண்டஅள்ளி அருகே ஆத்துமேடு பகுதியில் போலி மதுபான தொழிற்சாலை நடத்தி அங்கு இருந்து போலி மது பாட்டில்கள் தயாரித்து பல்வேறு பகுதிகளில் விற்பனை செய்யப்படுவதாக மாவட்ட போலீஸ் சூப்பிரண்டுக்கு ரகசிய தகவல் வந்தது.

இதையடுத்து உடனடி நடவடிக்கை மேற்கொள்ளுமாறு மதுவிலக்கு அமல் பிரிவு போலீசாருக்கு மாவட்ட போலீஸ் சூப்பிரண்டு கலைச்செல்வன் உத்தரவிட்டார். அதன் பேரில் மதுவிலக்கு அமல் பிரிவு துணை போலீஸ் சூப்பிரண்டு ராஜாசோமசுந்தரம் தலைமையில் இன்ஸ்பெக்டர் பாரதிமோகன், சப்-இன்ஸ்பெக்டர் விஜயசங்கர், மதுவிலக்கு போலீசார் மற்றும் மாரண்டஅள்ளி போலீசார் சம்பந்தப்பட்ட புகார் வந்த ஆத்துமேடு கிராமத்தில் அகரம் ரோட்டில் உள்ள போயர் கொட்டாய் பகுதியில் நேரில் சென்று அதிரடி சோதனை நடத்தினர்.

அப்போது அங்கு பழச்சாறு மற்றும் மது அல்லாத ஒயின் தயாரிப்பதற்கு அரசிடம் அனுமதி பெற்று விட்டதாக போலி ஆவணங்கள் தயாரித்து போலி மதுபான தொழிற்சாலை நடத்துவது தெரியவந்தது.

இங்கு கள்ளச்சாராயம் தயாரித்து, அதற்கு கலர் கலந்து அதனை மது பாட்டில்களில் நிரப்பி போலி மதுபான கம்பெனி ஸ்டிக்கர்கள் ஒட்டி பல்வேறு பகுதிகளுக்கு விற்பனை செய்யப்படுவதுவது தெரியவந்தது. உடனே போலீசார் அந்த போலி மதுபான தொழிற்சாலையை நடத்திவந்த சுந்தரராஜன்(வயது 45), இவரது மனைவி முத்துமணி (37), இவர்களது வளர்ப்பு மகன் ஷேக் பாண்டியன் (25) ஆகிய 3 பேரையும் போலீசார் கைது செய்தனர்.

மேலும் போலி மதுபானம் தயாரிக்க பயன்படுத்திய உபகரணங்கள், கள்ள சாராயம் தயாரிப்பதற்கான மூலப் பொருட்கள், மது பாட்டில்கள் மற்றும் 3000 லிட்டர் கள்ளச்சாராயம் ஆகியவற்றை பறிமுதல் செய்தனர். இதுதொடர்பாக மதுவிலக்கு போலீசார் வழக்குப்பதிவு செய்து விசாரணை நடத்தி வருகின்றனர். இங்கிருந்து எந்தெந்த பகுதிக்கு போலி மதுபாட்டில்கள் சப்ளை செய்யப்பட்டது என்ற விவரங்களை சேகரித்து அது தொடர்பான விசாரணையில் போலீசார் ஈடுபட்டுள்ளனர்.

மாரண்டஅள்ளியில் போலி மதுபான தொழிற்சாலை கண்டுபிடித்து அழிக்கப்பட்ட சம்பவம் அந்தப் பகுதியில் மிகுந்த பரபரப்பை ஏற்படுத்தி உள்ளது.