சென்னையில் மது போதையில் தந்தையை கொன்ற மகன் கைது

சென்னை எம்ஜிஆர் நகர், சூளைபள்ளம் வெங்கட்ராமன் சாலையைச் சேர்ந்தவர் செல்வம், (47). இவர், ஜாபர்கான்பேட்டை, ஆர்.வி.நகரில் மீன் வியாபாரம் செய்து வந்தார். இவரது மனைவி சுமதி, 44. இவர்களுக்கு பிரகாஷ், 20, என்ற மகன் உள்ளார்.

மதுவுக்கு அடிமாகி, போதையில் பிரகாஷ், அடிக்கடி வீட்டில் தகராறு செய்து வந்தார். இதனால் விரக்தியடைந்த செல்வம், சில ஆண்டுகளுக்கு முன், மகனை வீட்டை விட்டு வெளியேற்றினார். இதையடுத்து, துர்க்கையம்மன் தெருவில் பிரகாஷ் தங்கி வந்தார்.

இந்நிலையில், நேற்றிரவு பிரகாஷ் தனது தாயை பார்ப்பதற்காக வீட்டிற்கு சென்றார். அப்போது, மது போதையில் இருந்ததால், தந்தைக்கும் மகனுக்கும் இடையே வாக்குவாதம் ஏற்பட்டுள்ளது. இதில் ஆத்திரமடைந்த பிரகாஷ், கத்தியால் தந்தையின் பின் கழுத்து மற்றும் வயிற்றில் குத்தினார். இதில், மயங்கி விழுந்த செல்வத்தை, அவரது மனைவி மீட்டு, கே.கே.நகர் அரசு மருத்துவமனையில் சேர்த்தார்.

அங்கு மருத்துவ பரிசோதனையில் அவர் இறந்தது தெரியவந்தது. தகவல் அறிந்த எம்.ஜி.ஆர். நகர் போலீசார், பிரகாஷை கைது செய்து சிறையில் அடைத்தனர். மது போதையில் தந்தையை மகன் குத்தி கொலை செய்தது, விருகம்பாக்கம் பகுதியில் பரபரப்பை ஏற்படுத்தி உள்ளது.