சாா்ஜாவிலிருந்து விமானத்தில் கடத்திவந்த ரூ.31 லட்சம் மதிப்புடைய தங்கம் பறிமுதல்

சாா்ஜாவிலிருந்து விமானத்தில் கடத்திவந்த ரூ.31 லட்சம் மதிப்புடைய 633 கிராம் தங்கம் சென்னை விமானநிலையத்தில் பறிமுதல் செய்யப்பட்டது.,தஞ்சாவூரை சோ்ந்த கடத்தல் பயணி மற்றும் கடத்தல் தங்கத்தை வாங்க வந்தவா் ஆகிய 2 பேரை சுங்கத்துறையினா் கைது செய்தனா்.

சாா்ஜாவிலிருந்து சென்னை சா்வதேச விமானநிலையத்திற்கு ஏா்அரேபியா ஏா்லைன்ஸ் சிறப்பு விமானம் இன்று காலை வந்தது.அதில் வந்த பயணிகளை விமானநிலைய சுங்கத்துறையினா் சோதனையிட்டனா்.அப்போது தஞ்சாவூரை சோ்ந்த அகிலன்(27) என்ற பயணி மீது சந்தேகம் ஏற்பட்டது. அவரை நிறுத்தி சோதனையிட்டனா்.அதோடு அவரை தனி அறைக்கு அழைத்து சென்று சோதித்தனா். அப்போது அவருடைய உள்ளாடைக்குள் மறைத்து வைத்திருந்த 3 பிளாஸ்டிக் குப்பிகளை எடுத்தனா். அதை திறந்து பாா்த்தபோது,அதற்குள் தங்க பேஸ்ட் மறைத்து வைத்திருந்ததை கண்டுப்பிடித்தனா். மொத்தம் 633 கிராம் தங்க பேஸ்ட்டை பறிமுதல் செய்தனா். அதன் சா்வதேச மதிப்பு ரூ.31 லட்சம். இதையடுத்து கடத்தல் பயணி அகிலனை கைது செய்து விசாரணை நடத்தினா்.

அப்போது அகிலன் ராமநாதபுரத்தை சோ்ந்த முகமது வியாஸ்(23) என்பரிடம் கொடுக்கத் தான் இந்த தங்கத்தை கடத்தி வந்தேன். அவருடைய நண்பா் ஒருவா் தான் சாா்ஜாவில் இந்த தங்கத்தை என்னிடம் தந்து அனுப்பினாா். இதை முகமது வியாஸ் சென்னையில் என்னிடம் வாங்கிக்கொண்டு ரூ.10 ஆயிரம் தருவதாக கூறினாா். முகமது வியாஸ் தற்போது என்னை அழைத்து செல்ல விமானநிலையம் வந்துள்ளாா் என்று கூறினாா்.

இதையடுத்து சுங்கத்துறையினா் அகிலனை மட்டும் தனியே வெளியே அனுப்பி ரகசியமாக கண்காணித்தனா். அகிலன் வெளியே வந்ததும், காா்பாா்க்கிங் பகுதியில் நின்ற முகமது வியாஸ் வந்து அகிலனை வரவேற்றாா். இதையடுத்து சாதாரண உடையில் மறைந்திருந்த சுங்கத்துறையினா் முகமது வியாஸ்சை சுற்றிவளைத்து கைது செய்தனா். இதையடுத்து இருவரிடமும் சுங்கத்துறையினா் தொடா்ந்து விசாரணை நடத்துகின்றனா்.